Shillong, Rymphang 20 : Ka Sorkar Jylla kala thung ia u Administrator ban pyntreikam ia ka hukum khangdam bad pynduh pyndam shisyndon ia ka CMJ University.
U Commissioner & Secretary ka Tnad Education Vijay Kumar ula pynmih ia ka jingpynbna hynne ka sngi Palei kaba ong “Haba pyntreikam ia ka hukum ka Iingkashari Supreme Court ba 13 tarik Rymphang, 2025, bad kat kum ka kyndon 48 jong ka CMJ University Acr, 2009, u Lat ka Jylla u sngewbha ban thung ia D Lyngdoh, Joint Secretary ka Sorkar Meghalaya, ka Tnad Education kum u Administrator ka CMJ University Meghalaya. U dei ban pyntreikam ia ka hukum ban pynduh pyndam noh ia ka University ha ka rukom bala mynjur da ka Sorkar Jylla”.
Ha ka 14 tarik Rymphang, lain gut ki heh Ophisar halor ka jingbthah ka Sorkar Jylla, kila leit iuhkjat hapoh ka campus ka CMJ University kaba don ha Jorabot ban pynthikna ia ka jingshngain jong ka campus.
Ka kynhun kala bthah ia ka University ban sangeh lut ia baroh ki kam pyniaid ia ka pisa pilain, ka jingpyniaid ia ki kam bad ka pule ka dang nalor ban pynthikna bay m dei ban pynkynriah ne pynkhih ia ki jingdon jingem napoh ka campus, kynthup ki file, ki computer, hard disk lane kiwei kiwei ki tiar.
Ia kane ka kam la leh hadien ka hukum bala pynmih da ka Iingkashari Supreme Court ha ka 13 tarik Rymphang, kaba hukum ban pynduh pyndam noh ia ka CMJ University ha Meghalaya, haba pynskhem ia ka rai jong ka Sorkar Jylla ban khang dam ia kane ka skulbah ha u 2014 namar ka jingkynnoh ba ka shukor ia ki hajar ngut ki samla pule da kaba ai ia ki degree thok.
Ka Supreme Court kala pynksan ia ka hukum ka Sorkar Jylla ban kyntait ia ka jingbthah jong ka Iingkashari Meghalaya High Court ha u snem 2021 ba kan pyrkhat biang ia ka jingkhangdam ia ka university.
Kane ka hukum ban pyndih pyndam ia ka Univeristy da ka Sorkar Jylla kala lam ruh sha ka jingtohkit kam bymman da ki Pulit ka Jylla pyrshah ia ka University, u CM Jha bad ki bahaiing hasem jong u, kiba dei ki Trusteee jongka CMJ Foundation namar ka jingshukor ia ki hajar ngut ki samla pule da kaba ai ia ki degree thok ban kamai spah.
