Shillong, Rymphang 19: Ka Nangkiew Irat SC kala pynrem da ka said ia ka Nongthymmai SC da 2-1 ha ka OC Blue Shillong Premier League 2024 kaba la long hynne ka sngi Balang ha SSA Stadium, First Ground, Polo.
Ka jingialehkai ha ka kylla step kala kut ha ka jingbym don kano kano ka kynhun ban lah ban thep kol hynrei mar ia sdang ka kylla miet, ka Nangkiew Irat kala ioh shi kol ia kaba la kum bakla thep da da u nongapkol ka Nongthymmai u Akash Thapa, ha kaba ula ioh ban kah ia ka bol kaba la shut jam da u Shaibor Nongrum hynrei ha ka por ba ula pyrshang ban iada da kaba thap da ka kti ia ka bol hynrei kala leit pynban shapoh kol.
Hadien kane u Banraplang Nongsteng ula thep ia ka kol ha ka minit kaba 78 na ka bynta ka Nangkiew Irat
Katba na ka jingbakla u nongap kol ka Nangkiew Irat u Surjay Kumar Pariyar u Mowell Chyne ula thep ia ka kol ha ka 87 minit na ka bynta ka Nongthymmai hynrei u Surjay ula ioh pat ban iada ia ka bol ban rung shapoh kol kaba la shut da u Donboklang Majaw lyngba ka penalty hashwa ban kut ka por.
Haba kine ki kynhun kila iakhun ha ka 6 tarik u Nohprah 2024, ka Nangkiew Irat kala pynleim ia ka Nongthymmai da 4-2.
Ka Nangkiew Irat mynta kala ioh khur 19 point hynrei kala neh hi ha ka kyrdan kaba 6, katba ka Nongthymmai kala neh hi ha ka kyrdan kaba 9 bad ka hap ban ialehkai sa laisen bad ka donkam ban khur ia ka jingjop ban lait na ka jingshah pynhiar kyrdan.
Ia kane ka jingialehkai la pyniiad bad khmih da ki Refree bad ki Offincial kiba dei ki kynthei suda kaba kynthup ia ka Kong Luckymerry Lyngdoh kum ka Refree, arngut ki Assistant bad ka Fourth official.
Ka jingialehkai ha ka sngi Palei kan long hapdeng ka Nongrim Hills SC pyrshah ia ka Shillong Lajong FC ha ka por 3 baje mynsngi.
Ka Lajong kala pynrem ia ka Nongrim Hills da 1-0 ha ka jingiakhun kaba la long ha ka 6 tarik u Kyllalyngkot.
