Shillong, Feb 17: Ka Shillong Lajong FC kala pynjem khnap ia ka Ryntih FC da kaba pynbam 10-0 ha ka jingiakhun ha ka OC Blue Shillong Premier League 2024 kaba la long ha SSA Stadium ha First Ground, Polo, hynne ka sngi Nyngkong.
Katba ha kawei pat ka jingiakhun ka Mawlai SC kala pynjem khnap ia ka Nongrim Hills SC da kaba pynbam da 8-1.
U Rangialehkai ka Lajong u Deibormame Tongper ula thep marwei 7 kol ha ka minit kaba 8, 22, 24, 29, 46, 53 bad 57 bad ka Ryntih kam shym la lah ban leh eiei ia une u ragialehkai uba la ioh thep ia ka Hatrick kaba nyngkong ha ka kylla step bad ha ka kylla miet ruh ula ioh biang sa kawei ka hat-trick bad u Deibormame mynta ula ioh thep haduh 17 kol ha kane ka lympung iakob ialehkai bad ula bat syndon ia ka kyrdan kaba nyngkong eh kum u nongialehkai uban ioh thep bun kol tam, katba u nongialehkai ka Rangdajied United u Owanijuh Pajuh, ula ioh thep 12 kol.
U Riborlang L Lyngkhoi ula thep kol ha ka 36 bad 61 minit bad u Yohaan Benjamin ula thep ia ka kol ha ka 51 minit na ka bynta ka Lajong.
Ka Ryntih kala dep ban shah pynrem ha ka Mawlai da 10-1 hynrei mynta ka kynti ka la shah pynjem khnap sa ha ka Lajong.
Ha ka jingiakhun hapdeng ka Mawlai SC pyrshah ia ka Nongrim Hills, u Baiaikara ula long u nongialehkai uba lai jong ka Mawlai ban ioh thep ia ka hat trick ha ka minit kaba 39, 59 bad 60 minit, katba ki 4 ngut kiwei pat kiba la ioh ban thep kol ki kynthup ia u Damanbhalang Chyne ha ka 9 minit, u Khrawkupar Jana ula thep kol ha ka 21 minit, u Donlad Diengdoh ha ka 70 minit lyngba ka Penalty bad u Samlang Rympei ha ka 89 minit. Katba haka minit kaba 64 kala don ka jingbakla ha kaba la kum thep ia ka bol sha ka kol da ka Nongrim Hill.
U Banshemphang Kurbah ula thep ia ka shi kol na ka bynta ka Nongrim Hills ha ka minit kaba 49.
Ka Mawlai kala bteng ban bat ia ka kyrdan kaba nyngkong da kaba ioh khur 35 point, katba ka Shillong Lajong kala ioh bat biang ia ka kyrdan ka baar bad ka Rangdajied United FC kaba don ha ka kyrdan ka baar kala poi noh sha ka kyrdan kaba lai watla ka jingioh point kine ki ar kynhun ka long mar 32 point.
Ha ka nsgi Baar, ka jingiakhun kan long hapdeng ka Rangdajied pyrshah ia ka Laitkor SC ha ka por 11 baje mynstep bad ha ka por 3 baje mynsngi ka jingiakhun kan long hapdeng ka Langsning FC pyrshah ia ka Sawmer SC.
