Shillong, Rymphang 17 : Ka Tnad Textiles ka jylla kala ioh ia ka khusnam Textiles Sustainability Award na ka Confederation of Indian Textile Industries (CITI) ha ka Bharat Tex 2025 Global Textiles Expo, kaba la pynlong da ka Department of Textiles, ha Bharat Mandapam, New Delhi.
Ia kane la pyntip da u Secretary General ka CITI, ba ka kynhun ki nongbishar kala “kala dap da ka jingkmen ia ka jingtrei shitom jong ka Department of Textiles ka Meghalaya ha kaba iadei bad ka Textile Heritage Revival”.
Kumba la pyntip da ka CITI, ka Textiles Heritage Reviver Award jongka CITI – Alekh kadei ka jingai burom ia ki riewshimet bad ia ki kynhun kiba shim ia ki sienjam ban pyniaid shakhmat ia ka jingpynkhie im ia ki kam thaiñ bad jingsuh ia ki jain tynrai, kaba ialeh ban kyntiew bad pynneh pynsah, kaba lam sah ka jingpynwandur thymmai ia ka jingriewspah ha ka kam thain bad jingpynmih ia ki jain kiba naduh ki por hyndai bad ban pynkup bor ia ka imlang sahlang lyngba ka jingnoh synniang lyngba katei ka bynta.
U Bah Frederick Roy Kharkongor, u Principal Secretary ka Tnad Textiles ka jylla ula pdiang ia katei ka ‘Special Award’ na ka bynta ka tnad bad ka jylla na ki kti jongu u Pabitra Margherita, u Myntri khynnah ka sorkar pdeng uba khmih ia ka tnad Textiles ha kaba la iadonlang ki heh ophisar ka sorkar pdeng, u Chairman ka CITI bad kiwei kiwei ki heh ki hain ha ka jingialang kaba la long hynne ka sngi Nyngkong kum shi bynta jongka CITI Textiles Sustainability Awards 2024-25 ha Bharat Mandapam, ha ka sngi ba pynhap pyrda ia ka Bharat Tex Global Textiles Expo ka baar.
Ha kane ka jingialang la ioh ruh ia ka jingpyninam na ki jingjop ha kaba iadei bad ka rukom thain bad ka jingsuh ia ki jain tynrai bad kala don ruh ka Fashion Show ha kaba la pyni kyrpang ia ki riam ki beit kiba la pynwandur kyrpang da ki nongsuh jain kiba paw na kylleng jong ka ri kynthup ruh na ka jylla Meghalaya.
Napdeng ki kam ba la shim da ka Tand Textiles naduh u snem 2019, ki kam ki kynthup ia ka jingpynbna paidbah bad ka jingai jingithuh ia ka shnong Umden -Diwon na Ri Bhoi District, Meghalaya kum ka ERI Silk Village kaba nyngkong eh ha u snem 2021, ka jingtei ia ka Design Innovation Research Centre, (DIRC) ha u 2022 bad la pyninam ruh ia ka jingpynmih ia u ksia ryndai, ka jingthain haduh ka jingsuh bad ka jingpynwandur ia ki jain bad ia ki riam ki beit, ka jingwanpeit bad ka jingpynpawnam ia ka Ryndia bad ban iaid shakhmat ban ioh ia ka GI Tag, ka jingbuh ia ka Eri Corner ha ka Megh Tex, ka jingshna iaka e portal halor ka Ryndia, ka jingpyniaid shakhmat bad ka jingpyntreikam ia ka Integrated Textile Tourism Project ha Nongpoh, ki prokram kiba ai jinghikai bad jingkyrshan ia ki nongsuh bad ki nongthain jain, ban pynwandur kyrpang ia ki jain, ka jingpyni nam ia ki jain kiba lathain kyrpang ha ka rynsan pyninam kiba long hapoh ka ri bad shabar ka ri, Dubai Expo, International Sericulture Commission,(ISC) Romana, Silk ha Lyon, France 2022, G20 Craft Bazar, Italy , Vietnam 2023, Bharat Tex Global Expo 2024 bad ka jingai jingkyrshan man la ka por ia ki kynhun kiba pynmih ia ki jain bad wad ia ki nongshna bad nongpynwandur kyrpang ia ki jain ban itynnad bad ki nongsengkam lajong ban iahsimbynta bad ban pyninam ia ki jain kiba la pynwandur kyrpang bad kumta ter ter.
 ha ka Bharat Tex 2025 Global Textiles Expo, kaba la pynlong da ka Department of Textiles, ha Bharat Mandapam, New Delhi.){kind=link}