Shillong, Rymphang 17 : U Myntri kam jngohkai ka Jylla Bah Paul Lyngdoh ula ong ba ki kam jngohkai pyrthei ha Jylla kila kiew bha naduh ba ka Jylla kala sdang ban pynlong ia ki concert jong ki kynhun tem bapher bapher.
Haba pynkynmaw ia ka jingsdang wan jong ki concert ha Meghalaya, u Myntri ula ong “ Ngi sdang ia kane naduh u snem 2004, hashuwa ban don ka jingpyrkhat ban kyntiew ia ka ioh ka kot na ki concert (concert economy). Mynta, ki nongpyn iaid bad ki nongrwai/kynhun tem ki pynbor dalade ba dei ban kynthup lang ia ka Shillong kum ka jaka ban pynlong ia ki concert. Kane ka dei ka sienjam kaba khraw bha ban kyntiew ia ka kam jngohkai ka Meghalaya bad ka kam iaput iatem”.
U Myntri ula pynpaw ia kane haba kren sha ki lad pathai khubor halor ka jingjop jong ka concert u Ed sheeran haba ban jur ia ka jingkongsan ba ka wanrah na ka bynta ka kam iarwai iatem bad ki kam jngohkai ha Meghalaya
“Kumba phi tip, u (Ed Sheeran) u don ha ka kyrdan ba-ar ha ka pyrthei mynta, bad ka jingkren hakhmat u paidbah ban ong ba kane ka dei ka concert ba bun paid eh bad ki paidbah kiba sngewtynnad eh na ki concert ba ula pynlong ha India ka pyni ba ka Shillong, ka don ia ka snam, ban long ka Nongbah ka iaput iatem kaba heh bha” ong u Bah Paul.
Haba kylli balei ba ia ki concert la jied ban pynlong nongkong eh ha Shillong bad Umiam ban ia kiwei kiwei ki jaka hapoh ka Jylla, u Bah Paul ula batai “ U dang pynjanai suki suki ia ki jingdonkam baroh ha kylleng ka Jylla-pynbiang ia ki surok ha ki jaka kyndong, pynbun ia ki iingbasa, pyntrei ia ki jingtei kiba donkam bad kiwei kiwei. Haduh mynta, ki nongrwai/kynhun tem bala wan tem ganfne ki jied ia ki jaka kiba biang lut nadong hadong ki jingdonkam”.
Haba kren halor ka jingwan ki paidbah sha ka concert, u Bah Paul ula ong “Hapdeng 30,000 haduh 35,000 ngut ki briew kila wan sha ka concert u Ed Sheeran. Katba ngi dang lum ia ki jingkhein halor ka jingwan ki briew ba nabar, ki trai Iing basa kila shongshit bha.
Ha ka sien ba nyngkong, ki nongwan kai kila wan sha Jylla wat ha kine ki bnai Kyllalyngkot bad Rymphang ba duna ki nong wan kai”.
Ban pynthikna ba ki nongwankai kin pynjlan ia ka jingsah hangne wat hadien ka concert, u Myntri ula ong ba ka Tnad Jngohkai kala thaw ia ki lad ki lynti mynta. “Ha ka jingsurvey jong ngi ka pyni ba ha ryngkat ka concert u Ed Sheeran, kiba bun ki nongwankai kila sah ha Jylla ban leit sa sha ka concert u Mr.Big kaba long hadien shisngi. Kiba bun ruh kila leit kai sha Sohra, Dawki bad Umiam. Da ka jingkynshew ba palat T.4000 klur ha ki kam jngohkai, ngi khmih lynti ia ka jingkylla kaba khraw ha kine ki arsnem ban wan” ula ong.
Haba phaikhmat sha ki por ban dang wan, u Myntri ula kren halor ki sienjam ba ka Sorkar kala shim ban pyntrei ia ki jing trei bapher bapher. “Ka jingpynleit jingmut jong ngi mynta ka long ban pynjanai ia ki jingtei ha ki kam jngohkai. Ka Ropeway Project kala don ha lynti, bad ngi la pyniasoh ia kiba bun ki jaka jngohkai ban pynshlur ia ki nongwan kai ba kin leit iuhkjat ha bun tylli ki jaka. Ngi la nang pyniar ia ka map jngohkai ban kynthup ia ki jaka jngohkai ba dang shu shem thymmai khnang ba kan pynsngewtynnad ia ki nongwankai”.
