Shillong , Rymphang 14: U President ka National People’s Party (NPP) ha Meghalaya bad Symbud Myntri Rangbah Bah Prestone Tynsong ula ong ba ka party (NPP) kala kut jingmut hok bad aiti ialade ban wanrah ia ki ain kiba treikam ban iada ia ki Jaidbynriew trai muluk ka Jylla.
Haba ialap elekshon ban pan jingkyrshan ia u MDC ba mynta ka Mairang Bah Batskhem Ryntathiang hynne ka sngi Thohdieng, u Bah Tynsong ula ong ba ka NPP kala kut jingmut ban khmih ia kine ki kam (shna ain) bad ia ka bha ka miat ki Jaidbynriew trai muluk.
Haba ai khublei ia ki paid Khasi bad Jaintia ba ki ai ka rai ia ka party ban ialam ha KHADC bad JHADC, ula kular da kaba ong ” Ngin nang bteng ban wanrah ia ki ain kiba treikam ban ai jingiada ia ki jingmyntoi bad ka bha ka miat ki paidbah da kaba iatreilang kham jan bad ki Dorbar Shnong”.
Ula ong b aka KHADC kala pynlong ia ka prokram ha kaba u Lat ka Jylla ula sam ia ki syrnot sha ki Rangbah Kur ban pyni ba kila shah pynkupbor kat kum ka ain bala mynjur da ka KHADC.
U Bah Tynsong ula ong ruh ba ka jingithuh ia ki Seng Longkmie bad ki Seng Samla ha ki Shnong ki Thaw da ka ain ruh ka dei kawei na ki jingkyrkhu kaba khraw nalor ka Khasi Lineage Act, kaba ai jingithuh ia ki Kur bapher bapher ka Ri-lum Khasi.
Halor ka Lineage Act, ula ong ba ka long kaba kongsan bha ia ki trai ri trai muluk. “Nga kyntu ia ki paidbah ba kin kyrshan tylli ia ka NPP bad vote ia u kyrtong ka party Bah Batskhem Ryntathiang khnang ba un lah ban shakri kham bha ia ki paidbah ka Mairang Constituency. Lada u shah ied, un sa iakren bad ka Sorkar ia kiba bun ki jingdonkam bad ki jingeh ba iakynduh hapoh ka constituency” ula ong.
Haba pynpaw ba ki paidbah ki ju kwah beit ia ka jingkylla ha man ki elekshon, u Bah Prestone ula ong “Phi lah iohi ia ka NPP ba kala lah ban wanrah ia ki jingkylla kiba donkam. Ngi la pynkha ia kane ka District thymmai-ka Eastern West Khasi Hills haba pynshong nongrim ia ka jingangnud bala slem jong ki paidbah. Mano ba leh ia kata lada kam dei ka party jong ngi. Kumta, balei ba ngi dang don daw ban ong ba ka NPP kam dei ka party kaba bha lane ka NPP ka dei ka party Garo. Lada ki paidbah ki ong ba ia kane, uwei pat uta u Prestone? Nga dei u President ka Party ha Jylla”.
Haba ther ia kito kiba pyrshang ban ialam bakla ia u paidbah da kaba kynnoh ba ka NPP ka dei ka BJP, u Symbud Myntri Rangbah ula ong “Ngan iathuh ha phi ba ia ka NPP la thaw da u Nongialam ba radbah ka Jylla (K) PA Sangma, uba dei u Lamphang barim ka Lok Sabha n aka thain. Ka riti treikam jong ka NPP ka long ban ai jingiada ia ki paid riewlum ym tang ha Meghalaya hynrei ha baroh kawei ka thain Shatei Lam Mihngi. Ki briew na kylleng ki bynta jong ka Ri kila wan ban ai ka jingkyrshan ia ka jingpynkha ia ka NPP. U Nongialam ka Uttarakhand ula wan bad iakynduh ia ngi bad pynpaw ia ka jingkwah ban thaw ia ka NPP ha ka Jylla jong u ban iada ia ki riewlum ba rit paid ka Jylla. Sngewbha wat pyrkhat ba ka NPP ka dei ka nongwei”.
 ha Meghalaya bad Symbud Myntri Rangbah Bah Prestone Tynsong ula ong ba ka party (NPP) kala kut jingmut hok bad aiti ialade ban wanrah ia ki ain kiba treikam ban iada ia ki Jaidbynriew trai muluk ka Jylla.){kind=link}