Shillong, Rymphang 06 : Ka Shillong kala dep pynkhreh nadong hadong ban pynlong ia ka jingialehkai ha ka sien ba nyngkong eh jong ka lympung Indian Super League, ka ban long hapdeng ka Northeast United FC pyrshah ia ka Mumbai City FC.
Kane ka jingiakhun kine ki kynhun ba radbah ka India kan long ha Jawaharlal Nehru Stadium la sngi Thohdieng, ha ka por 7:30 baje janmiet.
La khmih lynti ba kane ka jingialehkai kan khring bad pyndap smam ia ka stadium khamtam ia ki nongieid phutbol ka Jylla ki ban sa mih paidbah ban kyrshan ia kane ka Club jong ka thain Ri-lum.
Lah ban kdew ba ka Jawaharlal Nehru Stadium ka dei kaba dang shu dep maramot shen bad kawei na ka jingpynkylla kaba khring duh ka dei ka jingsiang ia u phlang shisha ha madan.
Ia mynta, ki rang ialehkai ka Mumbai FC ki la pynlong ia ka jingkilan met hapoh ka madan ialehkai phutbol ka NEHU.
Ka NorthEast United FC ka don mynta ha ka kyrdan kaba 4 ha kane ka league katba ka Mumbai FC ka don ha ka kyrdan kaba 6. Kine ki ar kynhun kila phaikhmat ban ioh khur ia ka lai point katba ka jingiakhun ka dang iaid shakhmat.
Ki rang ialehkai ba hap iakhmih
- NorthEast United FC – Aladeen Ajaree & Redeem Tlang
- Mumbai City FC – Lallianzuala Chhangte (Captain & Winger)
