Shillong, Rymphang 05: Ka Myntri ka Koit ka Khiah ka Kong Ampareen Lyngdoh hynne ka sngi Balang, kala ong ba ka sorkar jylla kan pynrungkam shuh shuh ia ki Doctor Specialist ha kine ki sngi ban wan bad kala pynthikna ba 6 snem nangne shakhmat, ka jylla Meghalaya kan ym don shuh ia ka jingduna jong ki doctor shisien ba lah dep tei ia ka Shillong bad Tura Medical College.
Haba iakren bad ki nongthoh khubor, ka Kong Ampareen Lyngdoh kala ong, “Ngi dang trei ia ka kam bad shisien ba ngi lah pynbiang ia kiei kiei baroh ha ka lynti kaba ryntih, ngin sa thungkam ia bun ngut ki Specialists”.
Kala pyntip ba ia kane ka mat la shimkhia bad u Myntri Rangbah ka Jylla u Conrad K Sangma ban pynioh ia ki jingbit bad ki jingmynjur na ka bynta thungkam da ka kontrak.
Hadien ba la de plum ia ka jingialang bad ki heh ophisar ka tnad ka koit ka khiah, ka Kong Ampareen kala ong, “Ngi lah dep ban iakren lypa ia katei ka kam. Mynta ka kynhun myntri kala shim ban pynmih ia ki katto katne ki jingpynbna ia kaba dang donkam ban khmih bniah bha. Nuksa, kan ym don kano kano ka jingthungkam ha ki katto katne ki kyrdan jong ki nongtrei khlem da ioh ia ka jingmynjur na ka kynhun myntri, kumta ngim lah ban ai ia ka kam kumto khlem da dei hi da ka jingthungkam da ka kontrak ia ki Specialist kiba don ha ki kyrdan bapher bapher. Kane ka lah ban kynthup ym tang ia ki doctor hynrei ngi peit ruh ia ki Technicians, Nurse bad ia ki baroh namar ba lada phi thungkam iano iano ruh da ka kontrak, ngi hap long kiba husiar ia ki hok ki jongki. Ngi donkam ban don ia ka jingsngewkhia ia kietei baroh”.
Kala ong ba ki Medical College kin sa urlong noh shen, ka Kong Ampareen kala ong “Ka Meghalaya mynta kan ym mad shuh ia ka jingduna (hadien) ki 6 snem nangne shakhmat. Ngi lah dep sdang ia kane. Ka USTM kala sdang ia ka prokram ka jongka. Hangtei ruh ngi ioh ia ka kabu kaba biang bha namar ba kala don ka jingiateh bad ka jingbuh ia ki kydon kiba biang lyngba ka jingbthah ka sorkar”.
“Ym tang ba ngi sdang ia ka MBBS program, ngi lah ioh ruh ia ka jingbthah ban don ia ki senior residency, junior residency, specialist bad ka MD program kala long kaba la iaid ryntih bha. Kumta kitei kiei kiei baroh kin iaid naka bynta ka jingbha bad ngin sa don ha ka kyrdan kaba biang bha”.
Haba kylli halor ka jingiatehkular, ka Myntri kala ong “Ngi lah dep ban iakren ia kane mynshwa. Ngi lah de pong ruh ba ka sorkar kan bei tyngka ia ki samla pule MBBS bad kidei ban wanphai sha ka jylla ban shakri ia ki paidbah ka jylla. Ngi ieng halor kata bad kam shym la don kano kano ka jingpynkylla”.
“Mynta kaba ngi donkam ban wad bniah ka long ban wad la ki don ne em ki samla pule MBBS kiba la leit pule lyngba ka bhah sorkar ki lah dep soi ia ka soskular bad ki jaka pule ki jongki. Kumta lada don mano manor uh kiba leit sha jylla UP ban pule MBBS na ka bhah pule, kumta ki lah ban don ka jingkohnguh hangtei ruh. Mynta ngi dang pyrshang ban wad ia katei hynrei tang shu sdang ia ka Medical College lajong bad sdang pyniaid shaid shaid ia ki prokram bad ka jingpule ngin ym donkam shuh ban ia kren ia kine ki jingduna ha ki snem ban wan” bad ka pynthikna ba ka sorkar ka iengskhem ban sdang noh mardor ia ki Medical College.
Ha kaba iadei bad ka jingphah hikai pyntbit ia ki doctor shabar ka jylla, ka Kong Ampareen kala ong, Mynta ngim ia trei lang tang bad ka Chennai. Ngi lah sdang ruh ia ka Short Term Specialisation Certified Courses bad kiwei ruh ki jaka pule. Mynta ngi dang peit ruh sa ia kiwei kiwei ki jaka pule lada ka rukom kynmaw ka jong nga ka long kaba dei. Ngi lah dep iasoi bad ka Apollo naka bynta ia ka jingpyntbit ha ki katto katne ki bynta bad ngi lah iasoi ruh bad kiwei pat ki jaka pule”.
