Sngewskhem ka Myntri ban jop bun eh ka NPP ha ka elekshon KHADC bad JHADC

Shillong, Rymphang 05: Ka nongïalam ka National People’s Party (NPP) Kong Ampareen Lyngdoh kaba dei ruh ka Myntri Sorkar ka la pynpaw ïa ka jingsngewskhem ba ka NPP kan bun paid duh ha ka elekshon ki 2 tylli ki Autonomous District Council (ADC) ha Rilum Khasi-Jaiñtia namar ba ki briew ki la ïohi ïa ka jingtreikam ba bha jong ka Party ha baroh ki liang.

Haba kren sha ki lad pathai khubor ka Kong Ampareen ka la ong ba ka NPP ka dang pynkhreh bha shaid shaid na ka bynta ka elekshon ADC ka KHADC bad JHADC ka ban long ha ka 21 tarik Rymphang.

“Ki bor ba halor ka Party kila kren shai ia ka thong. Baroh ngin trei shitom bad ngi dei ban pynthikna ba kine ki elekshon kin ym long than ki kam kynthoh shimet. Ym dei ban don ka jingsngew bitar. Ngi dei ban kynmaw ba baroh ngi don hangne namar ba ngi don kawei ka thong bad kata ka long ban shakri ia ki paidbah ka Jylla Meghalaya katba lah” ong ka Kong Ampareen.

“Ngim ju duh jingkyrmen ia kata. Kam pher, ka sain pyrthei ka don la ka jong ka bynta hynrei ka NPP ka khlain bad ka sngewskhem bad ngim tharai ba ka party kan ym long kaba hakhmat eh ha baroh 2 tylli ki ADC” ka la bynrap.

“Nga don ka jingsngew ba kine ki ilekshon MDC ki lah ban don ki jingmih kiba pher bak-ly-bak na ki elekshon ba la long mynshwa ha ka Jylla. Kan long kaba bakla ia nga ban kam lypa iaka jingjop hynrei ki kyrtong jong ngi ki long kiba la pynshong nongrim bad ki ioh jingkyrshan naka Party ban pynthikna ba ka jingioh Seat jong ngi ha ki district council kan long kaba shngain bad ngi peit ia kane ka jingiatreilang kaba ngi don ha ka Sorkar Jylla. Nga kyrmen ba ki kyrtong jong ngi kin trei bha bad nga duwai ba U Blei un kyrkhu ia uwei pa uwei u kyrtong bad ia ka Party” kala ong.

Haba kylli halor ka jingkam jong kiwei pat ki party, ka Nongialam ka NPP ka la ong ba kane ka elekshon MDC kan pyni ia ka dur kaba pher na ka elekshon MP kaba la dep.
“Kane ka dei ka jingkmen jong ka synshar paidbah ha India. Kawei pa kawei ka party ka kiew bad kin ong ba ka party jong nga ka jop. Ym don ei ei kaba lah ban leh shaphang kata” kala ong.