Nongpoh, K’lyngkot 5: Ka Meghalaya State Pollution Control Board (MSPCB) hynnin ka miet, kala leit ban khang khyrdep ia ki 6 tylli ki karkhana ba pynkhein ia ki kyndon pynmih tdem jaboh, kiba don ha Export Promotion Industrial Park (EPIP), Byrnihat.
Ia ki Nongtrei ka MSPCB la synran da ki bor pyniaid District kynthup ki Pulit.
Kine ki 6 tylli ki karkhana kiba shah khang tala ki kynthup ia ka Shyam Century Ferro Alloys Pvt Ltd, ka Khasi Alloys Ltd, ka Nalari Ferro Alloys Pvt` Ltd, ka Pawan Casting Pvt Ltd, FW Ferro Tech Pvt Ltd bad ka SR Bio-Product Pvt Ltd.
Dang shen ka MSPCB kala pyntip ba ha ka jingjurip ba man ka por jong ka Board la shem ba bunsien ki karkhana kim ju pynmeh ïa ki kor Pollution Control Device (PCD) ha EPIP, kiba long kongsan bha ha kaban pynduna ïa ki jing pynmih lyer kiba sniew.
Ka MSPCB ka la pynlong ïa ka jingpeitngor man ka por ïa ka jinglong ka lyer ha Byrnihat lyngba ki Ambient Air Quality Monitoring (AAQM) stations kiba don ha ki saw tylli ki jaka: EPIP, 15th Mile, 17th Mile bad Khasi Killing.
Ia ka jingpeit bniah la pynlong arsien ha ka shi taiew, bad ia ki jingkhein jingdiah la buh ha ka Environmental Air Quality Data Entry System (EAQDES) jong ka Central Pollution Control Board (CPCB), Delhi. La pynphriang ruh lyngba ki lad pathai khubor, ka website jong ka Board, bad ka website jong ka bor synshar distrik ba dei peit ia ka thain.
Hynnin ka miet, ki Heh Ophisar ka MSPCP kila hiar jurip biang ia ki karkhana kiba don ha 13 mer bad thew da ki kor ia ka jingpynmih tdem jaboh jong ki karkahan. Hynrei la shem ba bun ki karkhana kila pynsangeh ia ka jingtreikam bad ai dawa ia ka jingsniew bad thut jong ki kor ki bor.
Haba kren sha ki lad pathai khubor, u Environmental Engineer ka MSPCB Bah YF Laloo, u la iathuh ba ka MSPCB ka ju pynlong man ka por ia kane ka jingjurip ban lap ia ki karkhana kiba pynkhein ia ki kyndon iada ia ka mariang. U ong b aka jingkhynra kala jur bha ia ki karkhana naduh ka 24 tarik Kyllalyngkot hadien ki jingujor jong ki paidbah ka thain Byrnihat.
U Bah Lalloo u pyntip ba kine ki 6 tylli ki karkhana bala khang khyrdep, kin hap ban siew ia ka Environment Compensation namar ka jingpynmih tdem jabuh ba palat pud. U pyntip ba ka MSPCB kala dain kuna haduh T. 4 lak ia ka Shyam Century Ferro Alloys Private Limited bad T. 2 lak ia ka Khasi Alloys Private Limited.
Une u Heh Engineer ula pyntip ba ka MSPCP kan nang iai bteng ban pynlong ia kum kine ki jingjurip ha Byrnihat bad ha kiwei kiwei ki jaka jong ka Jylla ban tehlakam ia ka jingpynjaboh ki karkhana ia ka mariang.
Kat kum ka jingpyntip ka MSPCB, ka Byrnihat, Ri-Bhoi District, Meghalaya ka dei kaba don haduh 27 tylli ki karkhana kiba pynjaboh ia ka lyer, bad la pyniabynta ia ki katkum ka jingjaboh ba ki pynmih kata : Red Category: 5 tylli ki karkhana bad Orange Category: 22 tylli ki karkhana.
La pyntip ruh ba ki don 35 tylli ki karkhana kiba pynjaboh ia ka lyer ha ka Thain Burnihat kiba hap hapoh ka Jylla Assam bad la pynbynta ia ki katkum ka jingpynjakhlia jong ki ia ka lyer kata: Red Caregory :20 tylli ki karkhana bad Orange Category : 15 tylli ki karkhana.
Da kaba shimkhia ia ka jingdon jong ki karkhana kiba pynjaboh ia ka lyer ha Byrnihat Area ha baroh ki liang ka Meghalaya bad Assam, kala don ka jingiatreilang hapdeng ki arjylla ban leh eiei halor ka jing jaboh jong ka lyer.
