Shillong, Rymphang 05 : Ka United Democratic Party (UDP) ha ka sngi Balang, kala kular ban nang pynkhlain shuh shuh ia ka Sixth Schedule ka Riti Synshar ka Ri bad pyntreikam ia ka bhah thungkam ba 3% ia ki briew ba duna dkhot met (PWD) lada ka shah jied ban wan sha ka bor ha ka elekshon Autonomous District Council (ADC) ka Ri-lum Khasi bad Jaintia, ka ban long la 21 tarik Rymphang.
Kine ki dei ki mat kular elekshon (manifesto) napdeng ki 20 tylli ki mat bala pyllait paidbah da ka UDP ha ka jingialang ba long hynne ka sngi ha ka jingdonlang u Myntri Sorkar Bah Paul Lyngdoh, u CEM barim ka KHADC Bah Titosstarwell Chyne, u General Secretary Bah Jemino Mawthoh, ki MLA bad MDC naor ki nongtreikam ka party.
Ka UDP kala kular ruh ba kan pyrshah jur ia kano kano ka jingthmu ban tih uranium bad pyntreikam ia ka Uniform Civil Code (UCC) hapoh ka Jylla.
Ka UDP kala pynieng haduh 40 ngut ki kyrtong ha kane ka elekshon ba kynthup ia 23 ngut ki ban iakhun na ki constituency ka KHADC bad 16 ngut na ki constituency ka JHADC.
Haba kren sha ki lad pathai khubor, u Bah Titos ula ong “Ngi kular ban buh bhah ba 3% ha ka thungkam thungjam ia ki briew ba duna dkhot met ha ki District Council. Kane ka dei ha ka sien ba nyngkong ba kino kino ki party kin shimkhia ia kane ka kam. Ngi kmen eh ban pyntreikam ia ka 3 % ka bhah thungkam ia ki briew ba duna dkhot met lada shah jied ban wan ha ka bor”.
Haba ban jur ia ka jingdonkam ban pynkupbor ia ki ADC, une u MDC ka Sohra bad Nongialam ka Liang Pyrshah ha KHADC ula ong “Ngi kwah kham bun ka bor ia ki ADC khamtam ha ka jinglong trai ia ka khyndew ka shyiap badkawei pat ba iadei bad ka para 3 jong ka Sixth Schedule”.
“Ngi la dawa ruh ban bishar biang ia ka para 12(a)(b) jong ka Riti Synshar ka Ri bad ngi kwah ruh ban pynkylla ia ki katto katne ki kyndon ba iadei bad u Lat ka Jylla haba phai sha ka jingai jingbit ia kino kino ki Bill ba mynjur da ki ADC haba phai ka Article 200 jong ka Riti Synshar ka Ri” ula ong.
Haba pynpaw ba ka UDP ka kwah eh ban pyntreikam ia ka nongrim jong ka ain kyntiap seng ha baroh ki ADC, u Bah Titos ula ong ba kane kan iarap ban tehlakam ia ka jingkynthih diengkper jong ki MDC hadien ka elekshon.
Ula pynpaw ruh ba ka UDP ka pyrshah jur ia ka jingthmu ban kynthup ne shu jied ia u MDC ba shusieh na ki Jaidbynriew Riewlum bym don nongmihkhmat (unrepresented Tribe) bad ruh ia ka jingpynjari ia ka Uniform Civil Code (UCC) ne kino kino ki Bill kiba long pyrshah ia ka bha ka miat ki paid riewlum.
U Bah Titos ula ong ruh ba ka manifesto kala ban jur bha halor ka jingkongsan ka synshar khadar ba khuid nalor ka jing kyntiew ia ki nongsumar dawai kynbat, ka jingiada ia ki khlaw bad ‘Law kyntang bad pyntreikam ia ka Solid Waste Management Act kumba ka long.
 ha ka sngi Balang, kala kular ban nang pynkhlain shuh shuh ia ka Sixth Schedule ka Riti Synshar ka Ri bad pyntreikam ia ka bhah thungkam ba 3% ia ki briew ba duna dkhot met (PWD) lada ka shah jied ban wan sha ka bor ha ka elekshon Autonomous District Council (ADC) ka Ri-lum Khasi bad Jaintia, ka ban long la 21 tarik Rymphang.){kind=link}