Ka jingim ba kordit u Parad | Hap die duh ia ki jingdon jingem ba ban ka jingshitom

Nongstoiñ, K’lyngkot 29: Ka jingban jong ka jingpang jingshitom ka pynlong їa ki longїing longsem ba ki hap ban їaleh katba lah ban thaw ki buit ki lad ban phah sumar tang ban їoh jingkoit. Na ka bynta ka bai dawai dashin bad ka bai sumar ki hap ban die wat їa ki jingdon jingem kum ki khyndew ki shyiap, ki jingri jingdup bad kiwei kiwei.

Kane kala jia ia uwei u Parad bala 69 snem ka rta, uba dei na ka Shnong Lawse, West Khasi Hills, uba la ioh ia ka jingpang khyllah kaba shu pynkhynniuh ia ka met ka phad baroh shi ryngieng kat haduh u pud ba um lah shuh wat ban bat ia ka pliang ja ruh.

Une u Parad u dei u Bah Spendro Sohshang uba la hap shu shah ia ka jingpang namar ka jingbym don lad shuh da kumwei.

Haba iakren bad Ka Shlem, une u Parad ula pyntip ba haba sdang kem kane ka jingpang, ula leit ban phah sumar ialade haduh shisnem kynthih ha NEIGRIHMS, Shillong bad ki doktor kila pynshai ba u don ia ka jingpang ha u dohnud. Ula ong ba ka jingsumar ha kane ka Hospital Sorkar kam shym la ai jingiarap eiei ruh em ia u.

Une u Parad u don ia ka Smart Card jong ka Meghalaya Health Insurance Scheme (MHIS) bad ula pyndonkam ia ka baroh shikatta ban ioh ia ka jingsumar hynrei mynta ka pisa bala ai bhah sha u, kala lut bad um lah shuh ban ioh jingsumar ei.

U pyntip ba dei namar kane, ula hap ban die lut ia ki jingri jingdup kum ki masi, ki blang bad wat ia ki kper ki phrah tang ban ioh bai dawai.

Ka jingpang jingshitom kala nang ban jur ia ka met jong une u Parad hynrei namar ka jingbym don lad bad bym don pisa shuh, ka jingsumar kaba tista ka dei kaba sha jngai bah bad ula ioh leit doktor tang haba don ki nongwan iarap synei.

Ia une u Parad la kyrshan dohiap da ki Khun Kynthei kiba hap ban leit shong iing briew ban ioh pisa bad ioh ai bai dawai iala u Kpa.

Une u Parad u shong tang bad lai ngut ki khun Kynthei hadien ka jingkhlad noh I Kurim bad kine ki khun Kynthei ki dang iashong samla ban kyrshan iala u jong u Kpa.