Shillong, K’lyngkot 28 : Ka Iingkashari Meghalaya High Court ha ka sngi Ba-ar, kala ai notice ban bishar ‘Contempt of Court’ ia ki san ngut ki nongpyniaid jong ka Don Bosco Technical School, Shillong namar ka jingpynpra ia ka Iingskul ka St.Anthony’s LP School hashuwa ban shim rai da ka Iingkashari.
Kine ki bor pyniaid ka DBTS ki kynthup ia u (i) Sagi Stephen Parappilly (ii) Arcadius Puwein (iii) Edmund Gomes (iv) Dianetius Fernandez and (v) Cyril Tirkey ka Don Bosco Technical School Shillong, Shillong -793003, East Khasi Hills District, Meghalaya.
Haba pynmih ia ka hukum hadien ba shong bishar ia ka PIL, ka Iingkashari ba kynthup ia u Chief Justice IP Mukerji bad u Justice W Diengdoh kila ong “Hashuwa ban shim rai ia kiwei ki kam jong kane ka kam, ngi bthah ban ai notice hapoh ka Contempt of Court (High court of Meghalaya) Rules, 2013 sha ki bor pyniaid ka Don Bosco Technical School ba kyrteng (i) Sagi Stephen Parappilly (ii) Arcadius Puwein (iii) Edmund Gomes (iv) Dianetius Fernandez and (v) Cyril Tirkey ka Don Bosco Technical School Shillong, Shillong -793003, East Khasi Hills District, Meghalaya, ban pynphai pat ha ka 24 tarik Rymphang, 2025 ban pynshai ba balei ba kim dei ban shah pynshitom namar ka jingleh pyrshah ia kane ka Iingkashari da kaba iadonlang ha ka sien shong bishar ba nyngkong jong ka Iingkashari”.
Ka Iingkashari ha ka hukum ba 9 tarik Nohprah 2024, kala bthah ia ka Sorkar Jylla ban leit jurip bad pynlong ia ka jingtohkit hapoh ka Meghalaya Heritage Act, 2012 bad ban aiti ia ka kaiphod sha ka Iingkashari halor ka jinglong kongsan kane ka jingtei ki men barim.
Ka kaiphod bala aiti da u AAG K Khan ka pyntip ba ia ka jingjurip bad jingtohkit la leh ha ka 16 tarik Nohprah, 2024 hapoh kane ka Ain bad la shem ba ka jingtei ka dang don kumba ka long. Hynrei hynne la pyntip da u nongiasaid ain jong ka Skul ba ia kane ka Iingskul la dep ban pynpra noh.
“Ban khanglad ia ka jingleh pyrshah biang ia ka kashari ne nang pynheh shuh shuh ia ka jingialeh pyrshah, ngi bthah ba ym dei ban leh eiei shuh haba iadei bad ka jingpynpra, jingshna ne pynkylla ia ka Iingskul kaba la don lyppa tad haduh da pynmih hukum kane ka Iingkashari” ong ka Iingkashari ha ka hukum.
Ka Iingkashari kala bthah ruh ia ki bor Pulit ba kin pynthikna ba ki bod pyniaid ka DBTS kin pyntreikam ia kane ka hukum,
Ka Iingkashari kala niew ia ka rai jong ki bor pyniaid ka St.Anthony’s Lower Primary School kum ka kam ba ialeh pyrshah khlem ka jingsheptieng wat hapdeng ka hukum bala pynmih ha ka 9 tarik Nohprah, 2024.
