Shillong, K’lyngkot 24 : U Myntri ka Tnad Pule Puthi Rakkam A Sangma ha ka sngi Thohdieng, ula pynbna ia ka rai jong ka Sorkar ban seng sa artylli ki Degree College hapoh ka Jylla ha une u snem pule ba mynta.
Haba iakren bad ki nongthoh khubor, u Rakkam ula ong ba ia kane ka jingtyrwa lah dep ruh ban ai jingmynjur da ka Ministry ba dei khmih ia ka kam.
“Kine ki artylli ki Degree College kin mih ha East Jaintia Hills bad ha West Khasi Hills” ula bynrap.
U Myntri ula pyntip ba ka Tnad Pule Puthi kila dep shna ia ka jingpynbna paidbah ban thungkam ia palat 100 ngut ki nonghikai ha kine ki artylli ki Degree College.
Haba kylli, u Rakkam ula ong ba ka Patharkhmah Degree College bad ka Rongjeng Degree College kin sa sdang noh ia ka jingshakri hapoh une u snem pule ba mynta haba bynrap ba ka Mawphlang Commerce bad Science College kin sa sdang mynta u snem pule.
Haba pynpaw ba ka Tnad Pule Puthi kala mad ia shibun bah ki jingtynjuh ha kine ki 40-50 snem, u Conrad ula ong “Ngi don bun eh ki skul, ki nonghikai haba ianujor bad kiwei pat ki Jylla hapoh ka Ri. Ngi don ia bun jait ki nonghikai. Hynrei ngi duna ha ka jingdon ki jingtei hynrei hapoh ka jingialam u Myntri Rangbah, ngi lah sdang ia ki jingpynkylla”.
“Ha kine ki san snem jong ka Sorkar MDA hapoh ka jingialam u CM, ngi la shna ia ki building ba thymmai jong ki College, jong ki Secondary School, jong ki Primary School bad kiwei ki jaka pule la ki dei ki Polytechnic, la ka dei ka ITI ne kiwei kiwei” ula bynrap.
Ha kajuh ka por, u Myntri u pyntip ba ka Tnad kan sa pynmih noh ia ka jingpynbna mynta ka sngi lane lashai na ka bynta ban thungkam ia ki nonghikai Lower Primary ha ki skul Sorkar.
