Shillong, K’lyngkot 23: Ki shipai BSF ka Meghalaya Frontier, kila ioh ban kem ia 6 ngut ki nong Bangla kynthup ia 4 ngut ki Khynnah, kiba wan rung tuh sha India bad thmu leit phai biang sha Bangladesh.
Ia kine ki nong Bangla la ioh kem da ki shipai ka 172 Bn katba ki dang thmu ban jam ia ka khappud ha ka thain East Jaintia Hills.
Kine ki briew ki kynthup ia arngut kiba la samla rangbah bad 4 ngut ki Khynnah ba dang hapoh 11 snem. Kine ki dei naka shnong Chootapuri, kaba hap hapoh ka Bagerhat District ka Bangladesh.
Ha ka jingtohkit, kine kila phla ba kila rung tuh sha India la katto katne bnai bad kila leit bylla sha ki iing briew ha Bangalore.
Kila phla ba mynta ki don jingthmu ban leit phai biang noh sha Bangladesh. Ia kine ki briew la aiti noh sha ki Pulit ka Umkiang ba kin tohkit bad leh ia kaba donkam kat kum ka ain.
