Shillong, K’lyngkot 21: Ka Mawlai SC kala pynkut iaka jingiakhun ha ka wat kaba nyngkong jongka OC Blue Shillong Premier League 2024 da kaba jop da 2-1 ia ka Sawmer SC ha ka jingialehkai kaba la long ha SSA Stadium, First Ground, Polo, hynne ka sngi Baar.
U Damanbhalang Chyne ula thep ia ka kol ha ka 42 minit bad u Robertson Khongriah ula thep kol ha ka 83 minit na ka bynta ka Mawlai, katba u Hilford Lyngkhei ula thep kol ha ka 48 minit na ka bynta ka Sawmer.
Ka Mawlai, kaba bat ia ka nam lahduh jongka OC Blue SPL ha ka samoi bala lah, kam pat shym la mad ia ka jingrem bad kala khur 25 point da kaba jop 8 sien bad iakhaid shisien. Kaba wan basr kadei ka Shillong Lajong FC kaba la kamai 22 point, bud pat da ka Rangdajied United FC kaba la kamai 19 point.
Katba ka Nongthymmai SC bad ka Ryntih FC ki don ha ka kyrdan kaba ki lah ban shah pynhiar kyrdan noh.
Ka jingiakhun hynne ka sngi kala long kaba itynnad, ha kaba Sawmer kala ialehkai bha bad kala pynbunkam bha ia ki nongialehkai ka Mawlai ban trei shitom bha ban ioh khur ia ka jingjop.
Kine baroh artylli ki kynhun kila ialehkai bha ha ka kyllastep bad kila ioh ia ki kabu hynrei kim shym la lah ban thep kol hynrei dei ha ka minit kaba 42 ba ka Mawlai kala ioh thep ia ka kol.
Mar ia sdang ka kylla miet, ka Sawmer kala ioh ban pyniakhaid noh da kaba thrp ia ka kol ha ka minit kaba 48 tang hadien ba la pynmih ia u Hilford Lyngkhei uba la thep ia ka kol.
Ka jingiakhun kala sdang biang ban itynnad hynrei hashwa ban kut, ha ka minit kaba 83 u Robertson ula thep ia ka kol ban pynthikna ia ka Mawlai ban khur ia ka jingjop.
Ka jingialehkai ia kane ka jingiakob ialehkai ha ka wat ka baar kan sdang ha ka sngi Balang, ha kaba ka Nangkiew Irat SC kan iakhu. Pyrshah ia ka Rangdajied ha ka por 11 baje mynstep bad ha ka por 2:30 janmiet ka jingiakhun kan long hapdeng ka Nongrim Hills SC pyrshah ia ka Langsning FC.
