Shillong, K’Lyngkot 20: Ka sharak lane ceremonial torch jong ka Meghalaya Games 2025 kala wan poi ha Jowai haka sngi Saitjain hadien ka jingïaid lynti kaba 18 kynta bad kaba iaid haduh 360 km.
Haba sdang na Tura, ka sharak ka la iaid lyngba ka Nongstoin bad Shillong shwa ban poi ha Loomkyrwiang Community Hall.
Iaka Sharak la pdiang da ki paidbah haka jingdon lang u MLA ka Jowai u Bah Wailadmiki Shylla, u President ka Meghalaya State Olympic Association (MSOA) u Bah John Kharshiing, u General Secretary ka MSOA u F Pariat bad u Rangbah Shnong ka Loomkyrwiang u Bah Lammatoo Laloo.
Kane ka sharak kala mih na PA Sangma Stadium, Tura naduh ka 17 tarik Kyllalyngkot bad ka jingpoi jong ka ha Iungwalieh, Loomkyrwiang, Jowai, ka dei ka dak ka jingpynsdang noh ia ki jingialehkai bapher bapher kaba long naduh ka 20 tarik haduh ka 25 tarik Kyllalyngkot.
Ia kane ka lympung ialehkai yn plie da u Myntri Rangbah ka Jylla Conrad K Sangma ha ka jingiadonlang u Myntri kam ialehkai Bah Shakliar Warjri nalor kiwei kiwei ki kynrem ki lyndan.
Kane ka lympung ialehkai kan sakhi ia ka jingiashimbynta ia palat 3500 ngut ki nongialehkai ki ban iakhun ban ioh ia ki 1600 tylli ki medal ha ki 23 tylli ki jaka ialehkai ba kynthup ia artylli ha Shillong bad Laitkor.
Ha ka sien ba nyngkong, kane ka lympung kan don ruh haduh 7 ngut ki para-athelete ba kynthup ia 4 ngut ki kynthei bad 3 ngut ki shynrang ki ban iashimbynta ha ka para-shooting (pistol bad rifle).
Kane ka sharak kan mih na Thadlaskein bad kan poi ha Wahiajer Football Stadium ka ban long ka jingia lehkai ha ka 21 tarik Kyllalyngkot.
