Mih ki Paidbah ban pyrshah ia ka jingkynnoh ai jaka sopsop ka Shnong
Shillong, K’lyngkot 20: Ka jingkulmar kaba shyrkhei kala Jia hynne ka sngi nyngkong ha ka thain mawkynrew, kaba la poi sha ka jingiakhru hapdeng u paidbah bad ki bor ka ain, kaba la pynlong ia ki pulit bad hap khyrwit lathi bad siat ia ki tyndong lyer pynsat khmat ban pynsaphriang ia u paidbah.
Kane ka jingjia kala mih na ka jingpyrshah jong u paidbah ia ka jingai jaka jong ki bor pyniaid shnong ka mawkynrew pyllun sha ka Ram Krishna Mission, kaba la pyntrei ia ka iingskul ha ka thain.
Ki paidbah kiba la mih ban pyrshah ia kane ka jingai jaka ki dei kiba na ka shnong Mawleiñ bad Mawkynrew. Ki paidbah kynthei bad shynrang kila mih ban pyrshah ia kane ka kam da kaba thmu bad sieh diengkol ha madan Umjar, kaba pynieng ia kane iingskul.
Ha shwa ka jingshah kawang bom lyer pynsat khmat bad shah bom lathi, kine ki nongshong shnong ki la rah ia ki dieng kol ryngkat ki mohkhiew, ki lyngka lem ki placard ban pyrshah ia ka jingïoh jaka ka Ram Krisna Mission ban tei skul bad wan ïaid sha katei ka madan
Ki la pynpaw ba ia katei madan la dep aiti ruh sha ka Mawkynrew Sports Club ban pyndonkam bad kumta ka jingai jaka sha ka Ram Krisna Mission ka long kaba sopsop da ka jingtip ki katto katne kiba iadonkti.
Ha ka jingwan jong kitei ki nongshong shnong ki la ia tyngkhuh bad ki bor pulit bor majistor ha surok ban rung sha katei jaka bad hangne ki paidbah ki la thom da ka bor ia ki pulit.
Ki pulit ki la hap ban jubab da kaba bom lathi ia ki bad kawang da ki tear gas ban pynpra ia u paidbah.
Hynrei kine ki nongshong shnong kim shym la randien bad ha ka jingiakhun ki la ïoh ban sieh ia kitei ki dieng kol ha katei ka madan.
Nalor kane la ioh jingtip ba don haduh kumba 6 ne phra ngut kiba la mynsaw kynthup kawei ka longkmie ba dang armet kumjuh ruh napdeng ki pulit.
Kumba long mynta ka jinglong jing man ka la jaijai bad ki nongshong shnong ki dawa ba u Bah G Dhar, BDO ka Mawkynrew C&RD Block ba u dei ban mihnoh na ka thain jong ki.
