Shillong, K’lyngkot 16 : U Myntri Rangbah ka Jylla ha ka sngi Balang ula iasam ia ka jingthmu bad jingangnud jong u ia ki kam ban pynurlong ha u snem thymmai-2025, ba kynthup ia ka jingwan hiar ka liengsuin kamai ba heh ha Umroi Airport, ka jingplie ia ka Medical College, ka jingshna ia ka Govt Secretariat ha Mawdiangdiang bad jingpyntreikam ia ki project surok kiba kongsan ha Jylla.
Haba kren halor ka Umroi Airport, u Conrad ula ong “Nga kwah eh ba kham kloi kat kaba lah, ki liengsuin kamai ba heh ki dei ban wan hiar ha Umroi. Bad wat hynnin ka sngi, ngi la dep shong jingialang. Ngan sa iashong jingialang ha Delhi ha ka 16 tarik K’lyngkot ruh bad ha ka taiew ba nyngkong u Rymphang ngin sa iashong jingialang bad ki kynhun bapher bapher”.
Haba pynpaw ba ka Sorkar India kala ai ia ka jingkyrshan ba pura halor kane, u Myntri Rangbah ula ong “Nga kyrmen ba shen ngin sa ioh ia ka liengsuin kamai kaba wan hiar beit beit na Delhi bad na kiwei ki jaka bad nga ngeit ba kane kan long kawei na ki kam ki ban wanrah ia ka jingkylla ia ka Jylla jong ngi khamtam haba phai sha ki kam kum ka kam jngohkai, ka pule puthi bad ka jingkiew shaphrang jong ka Jylla. Kumta kane ka dei kawei na ki kam kiba nga kwah eh ban pynurlong bad nga kyrmen ba kan sa iaid ha ka lynti kaba dei”.
U Myntri Rangbah ula pyntip ba ka Sorkar kala trei shitom ruh ban pynthikna ia ka jingpyniasoh da ka liengsuin hapdeng ka Shillong bad Tura.
“Sa shisien, nga kmen ban iathuh ia phi ba ngi la trei shitom bha. Ngi la dep iashong jingialang la bun sien halor kane ka kam bad ka Sorkar India ha ka UDAN Scheme ba dang shen ruh kala kynthup ia kane ka kam”.
Artylli ki Medical College :
“Nga kyrmen ban gin sa lah ban sdang noh ia ka Shillong Medical College naduh une u snem pule ba mynta, ka ban sdang ha u bnai Nailur 2025 bad ngi la trei shitom ruh ban lah pyntreikam noh ia ka Tura Medical College” pyntip u CM.
Halor ka jingiaid ki kam jong ka Tura Medical College, ula ong “Watla ki jingtei kila mih sted bha, ngi don pat ia ki jingtynjuh haba iadei bad ki nongtrei, ngim ioh satia ia nongtrei ban iatrei hangtei bad watla kane ka jingpynlut ka ban kot da ki spah klur, lada ngi dei ban pyniaid makna, ngin shem jingeh namar ka jingbym don nongtrei. Mynta ngi la wad ia ki lad ki lynti ban weng ia kane ka jingeh”.
Ka jingshna ia ka Secretariat ba thymmai ha Mawdiangdiang :
U Myntri Rangbah u pyntip “ Ha ka 21 tarik Kyllalyngkot kata ha ka sngi rakhe ba ka Meghalaya ka ioh Jylla la ka jong, ngin sab uh ia u maw nongrim jong ka Secretariat ba thymmai ha Mawdiangdiang. Kane kan long kaba kongsan bha, ngi kyrmen ban gin lah ban pyndep la kumno kumno ruh ia katto katne Bnlock hapoh kine ki arsnem ban wan khnang ban gin lah ban pynkynriah noh ia ki katto katne ki Ophis nangne”.
Ula bynrap “Ha kajuh ka por, ia ka Mini Secretariat ha Tura ruh yn sa pyntrei noh hapoh u bnai ban wan, bad ka project ka dei kaba la mang T.120 klur. Ha Tura, kane ka jingtrei kan sa mih, ha Jowai, Pynursla ruh kan sa mih. Ngi sngew ba ka long kaba kongsan ban phah khmat bha sha ki jingshakri bad wanrah ia ka synshar khadar shajan jong ki paidbah ka Jylla”.
Ki project shna surok kiba heh:
U Myntri Rangbah ula ong “Ngi la phaikhmat bha sha kiba bun ki project shna surok. Ka project jong ka Express Corridor Umiam bad Ratacherra bad shaduh sha Assam, ka dei ka project kaba nga kwah iohi noh. Ka dei ka project kaba la mang haduh T.24000 klur, bad kan dei ka project kaba heh duh ka ban pyntreikam ha ka Jylla Meghalaya bad lehse ha ka thain Shatei Lam Mihngi baroh kawei.
Kumjuh ruh ha sor Shillong, u Myntri Rangbah ula pynbna ia ka plan jong ka Sorkar ban shna ia ki surok suin na ka bynta ban pynkylluid ia ka sor.
Ula pyntip ba un sa iakynduh ia u Myntri ka Road Transport ka Sorkar Pdeng lashai ka sngi ban iakren ia kane ka kam.
