Shillong, Jan 14: Ka Rangdajied United FC bad ka Shillong Lajong FC kila khur ia ka jingjop ha ka jingiakhun ia ka OC Blue Shillong Premier League 2024 kaba la long hynne ka sngi Baar ha SSA Stadium, First Ground, Polo.
Ka Rangdajied ruh kala jop da 4-0 ia ka Sawmer SC, katba ka Lajong kala jop da 1-0 ia ka Laitkor SC.
Ka RUFC kala ioh thep ia baroh kitei ki 4 kol ha ka kylla step lyngba u Ieitlang Syiemlieh ha ka 16 bad 30 minit, katba u Wansiewdor Nengnong ula thep ha ka 19 minit bad u Arlangky Nongsiej ula ioh thep kol ha ka 23 minit namar ka jingbym lah ki nongialehkai ka Sawmer ban ialehkai bha bad ka jingbym mih ki rangialehkai kiba pawkhmat namar ka jingmynsaw.
Ka Sawmer kala ioh arsien ia ka kabu ban thep kol ha ka kylla miet, ha kaba Hamebantei Khongphai ula shut ia ka bol bad kala leit dei ia u dieng kol bad na ka liang u Arlangky jong ka Rangdajied ruh uula ioh ia ka kabu hynrei ka bol kala leit dieng ia u dieng kol bad mih noh shabar.
Ha ka jingiakhun kaba hadien, la sakhi ba u Deibormame Tongper ula thep ia ka kol ha ka 74 minit kaba la pynthikna ia ka Lajong ban ioh khur ia ka jingjop hynrei hadien kane la pynshong noh ia u namar ka jingmynsaw ha ka kjat.
Ka Laitkor kala ioh ia ka kab kaba biang tam lyngba u Iaryngkatlang Kharkrang uba la shut ia ka bol hynrei u nongap kol ka Lajong u Siwel Rymbai ula ioh ban iada ia katei ka bol ban rung shapoh kol.
U Babysunday Marngar ula thep ia ka kol hynrei ym shim la khein namar b aula tam lypa shakhmat ia ki nongialehkai ka Laitkor bad hadien kane, shwa ban kut ka jingialehkai ha ka kylla step, ula ioh ia ka kabu kaba para marwei bad u nongap kol u Deranius Wahlang hynrei ym shim la lah ban thep kol.
Kane kadei ka jingiakhun kaba khatduh jongka Laitkor ha ka wat kaba nyngkong (first leg) bad kala jop 3 sien, iakhiad shisien bad rem san sien bad kala ioh khur 10 point.
Ka jingiakhun haka sngi Balang kan long hapdeng ka Mawlai SC kaba dang bat ia ka nam lahduh pyrshah ia ka Nongthymmai SC ha ka por 2:30 mynsngi.
