Hiar ka jingpynmih pisa ka KHADC haduh 49% ha u 2018-19 ba hiar ka jingioh grant bad khajna

Shillong, K’lyngkot 14 : Ka jingioh lum pisa jong ka Khasi Hills Autonomous District Council (KHADC) kala hiar da 49% na ka T.127.85 klur ha u snem 2017-18 sha ka T.64.66 klur ha u snem 2018-19.

Ka jinghiar jong ka jingpynmih pisa ha u 2018-19 ka dei namar ka jinghiar haduh 69% ha ka jingioh grant-in-aid bad 68% ka jingkhata ia ka bhah jong ka khajna na ki mar poh khyndew, ong ka Comptroller and Auditor General of India (CAG) ha ka kaiphod.

Ka ong ba kane ka jinghiar bun shah ha ka grant-in-aid ka dei namar ka jingbym pyllait ia ka grant to Excluded Areas/ Party IX & IX A jong ka Riti Synshar ka Ri India.

Kumjuh ruh, ka jingkhate ia ka bhah khajna na ki marpoh khyndew ka dei namar ka jingbym ioh ia ka bhah jong ka khajna na ki minor minerals ha u snem 2018-19.

Ka kaiphod ka kdew ruh ba ia ka bhah jong ka Council la pynshong nongrim na ka jingioh lum khajna ba shisnem jong ka Sorkar Jylla bad dei namar kata ka Council kam don bynta eiei ruh em ha ka jinglum khajna.

Ha u snem 2018-19, ka bhah jongka grant-in-aid (T.9.95 klur), ka bhah na ki marpoh khyndew (T.22.72 klur) bad ka bhah na ka khajna kali (T.12.74 klur) kaba long 70% jong ka jingioh lum pusa (T.64.66 klur) jong ka KHADC.

“Namar kata, ka KHADC ka shaniah tylli ha ki tyllong pynmih pisa na shabar (70%) ban iala ka jong ka tyllong (30%)” kala ong.

Nalor kane, ka CAG kala ong ruh ba ka jingpynlut pisa jong ka KHADC kala kiew da 27 % na ka T.45.95 klur ha u 2017-18 sha ka T.58.58 klur ha u 2018-19.

Ka jingkiew jong ka jingpynlut pisa ha u 218-19 ka dei eh namar ka jingkiew ha ka jingpynlut ban siew tulop bad ki jinglut ha ka Ophis hapoh ka Secretariat General Services kaba long na ka T.18.39 klur ha u 2017-18 sha ka T.22.75 klur ha u 2018-19 (24%) bad ka Forest na ka T.4.83 klur ha u 2017-18 sha ka T.7.35 klur ha u 2018-19 (52 %), kala ong.

Ha u 2018-19, ka Secretariat General Services (39%), Forest (13%) bad Public Works (8%) kiba long haduh 60% jong ka jingpynlut pisa, bad ieh khyndiat eh ia kiwei ki jingpynlut ha ki tnad ba kongsan kum ka Land Revenue, Arts & Culture bad Public Health Sanitation bad ka jingsam um.