Sohra, Nailar 12: Ka map jong ka Sohra kaba kdew ïa ki jaka ba paw bad ki jaka ba don ia ki jingtei ba lah rim bad ba phylla, ki lah ban pynsngewtynnad bha ia ki nongwan jngohkai bad ban pynlongruh ia ki ba kin khein kor ia ki khana bad ki jinghiar pateng la pateng jong ka thain.
Kane ka dei ka jingsngew bala pynpaw da u Myntri Rangbah ka Jylla Conrad K Sangma ha ka Sngi U Blei hadien ka jingiashim bynta ha ka Mass mynstep hapoh ka St.John Bosco Shrine ha Sohra, hadien ka Cabinet Retreat ba kut hynnin ka sngi Saitjain.
Hadien kane ka jingiaseng, u Myntri Rangbah ula pyndem jingduwai ha ka relic (met ba sah) jong u St.John Bosco. Ka dur mot ba shiryngieng jong une u riewkhuid, bala pynieng hapoh ka Iingmane naduh ba ka wan poi na Turin, Italy ha u snem 2006, la niew burom bha namar ka jingdon ki shyieng ka kti ka mon jong u St.John Bosco.
U Myntri Rangbah ula leit iuhkjat ruh hapoh ka Iingmane ka Sacred Heart of Jesus, ka Iingmane ka Balang Catholic bala rim duh ha Sohra.
Ia kane ka Iingmane la tei ha u snem 1905 da ka Society of Devine Savior Salvatorian. Ha phyllaw kane ka Iingmane, la thung ia uwei u dieng kseh ha ka por ba plie ia ka Iingmane u dang iai bteng ban pyni ia ka pateng kaba neh jong ki mishoneri kiba la seng ia ka Balang da ka jingthmu jong ka jingieit bad jingsngewrit.
Haba pyrkhat shaphang ka jingpaw jong ka jaka, u Conrad u la banjur ïa ka jingdonkam ban shna map bad pynriewspah ia ki jaka ba pawnam jong ka Sohra. Ka jingpynthymmai ia ka Iingmane Sacred Heart ha u snem ba la dep ka la pynneh pynsah ia ki jingoh dur da ka dieng jong u Jisu Khrist, u Joseph bad ka Mary, kaba pyni ia ka jingtrei kti kaba ni bad ka jingaiti lut jong ka juk kaba la leit noh.
