Shillong, K’lyngkot 11 : U Nongialam ka AICC ba khmih ia ka Meghalaya Dr A Chellakumar ha ka sngi Saitjain, ula pynpaw ia ka jingsngewskhem ba ka Congress kan ioh thaw ia ki Executive Committee (EC) ba thymmai ha ki artylli ki Autonomous District Council (ADC) ka Ri-lum Khasi bad Jaintia.
“Khlem pep ngin pynim biang ia ka Congress. Ha ka elekshon District Council, khlem pep ngin thaw ia ki EC” ong u Dr Chellakumar haba iakren bad ki nongthoh khubor hadien ka jingialang jong ka Congress.
Ula kam ruh ba ka Congress kala nang kiew sted bha bad ong “Bun ngut ki briew ki kwah ban wan iasoh sha ka congress bad kila wan iasoh ruh bad ki dang bun ki ban sa iasoh. Phin sa iohi hi ha kine ki sngi ban wan”.
Haba kylli halor ka rai jong ka Congress ban weng noh ialade na ka EC ka NPP ha KHADC tang hashuwa ka elekshon MDC, u Dr Chellakumar ula ong “Dei kane kaba nga la batai sha ki kyrtong ka party ba ngi la iasoh bad ka NPP ha ka District Council ban pynkhlain ia ka Sixth Schedule”.
Haba bynrao ia kane, u President ka Meghalaya Pradesh Congress Committee (MPCC) bad MP barim ka Shillong Bah Vincent H Pala ula ong “Ngi la bteng ban iatreilang bad ka NPP tad haduh ka sngi bala shim rai ia ka Amendment (jong ka Sixth Schedule) bad ka Parliament Committee kala pdiang ia ki jingai jingmut bala aiti da u Bah PN Syiem bad kiwei kiwei kiba dei na kiwei pat ki seng sain pyrthei ha ka jingialang bad ka Home Ministry ha Delhi”.
U Bah Pala ula pynpaw ia ka jingsngewskhem ba ki paidbah ka Ri-lum Khasi bad Jaintia kin vote ia ka congress ha kane ka kynti ia kaba la pynshong nongrim na ki synniang sha ki paidbah ka Jylla lyngba ka Sixth Schedule bad kiwei kiwei ki amendment/bill.
Haduh mynta, ka Congress kala pynbna haduh 42 ngut ki kyrtong ki ban aireng ha ka elekshon sha KHADC bad JHADC. Ia ka kyrteng u Bah Lawrence Nongrum ruh la pynbna mynta ka sngi kum u kyrtong na Nongpoh Constituency.
U Bah Pala ula ong ba ka Congress kan iakhun na ki 28 tylli ki constituency napdeng ki 29 tylli kiba don ha KHADC. “Ngi lah lane lah ban nym iakhun na kawei ka seat namar haduh mynta, ngim pat don ki nongpan ticket na Laban Constituency” ula bynrap.
Haba phai sha Jaintia Hills, une u Nongialam ka MPCC ula ong ba un sa pynlong ia ka jingialang ha ka thain la 14 tarik Kyllalyngkot bad lah ban shim rai khatduh ia ki kyrtong hapoh ka 15 lane 16 tarik. Ia mynta, haduh 16 ngut la dep ban pynbna ia ka kyrteng ki kyrtong sha ka elekshon ha JHADC.
 ba thymmai ha ki artylli ki Autonomous District Council (ADC) ka Ri-lum Khasi bad Jaintia.){kind=link}