Shillong, K’Lyngkot 10: Haka sien ba nyngkong, ka Sohra, ka jaka jngohkai pyrthei kaba khring duh ha Jylla, kala ioh ban pynlong ia ka jingialang jong ka kynhun Myntri Sorkar lane ka Cabinet Retreat.
Kane ka jingialang Cabinet Retreat ka dei shi bynta na ka sienjam jong ka Sorkar ban pyniajan hapdeng ki tnat treikam Sorkar bad ka thain.
Iaka jingialang la pyniaid hi da u Myntri Rangbah u Conrad Sangma haka jingdon lang ki Myntri naduh u Bah Sniawbhalang Dhar, ka Kong Ampareen Lyngdoh, Paul Lyngdoh, Rakkam Sangma, Kyrmen Shylla, Comingone Ymbon, AT Mondal.
Ka thong jong ka Cabinet Retreat kadei ban ailad iaki tnat treikam Sorkar ban pyni iaki kam, ki skhim ba kongsan ban pyntreikam hapoh ka thain ba pdiang iaka jingialang kynhun Myntri Sorkar naka bynta ka jingmyntoi ki paidbah nong shong shnong bad ka thain baroh kawei.
