Shillong, K’lyngkot 10 : U Myntri Rangbah ka Jylla Conrad K Sangma ha ka sngi Thohdieng, ula plie paidbah ia ka jingrakhe dap 100 snem jong ka shnong Chutwakhu, West Jaintia Hills District.
Haba ai khublei ia ka jingnoh synniang ki Nongialam barim ka Chutwakhu, u Myntri Rangbah ula ai khublei ia ka Dorbar Chnong ka Chutwakhu halor ka jingdap 100 snem, kaba rakhe ruh ia ka mynsiem jong ka iatylli kum ka shnong ha kaban wanrah ia ka roi ka par hapoh ka Shnong.
U Myntri Rangbah ula niew ruh ia ka Shnong Chutwakhu kum kaba kiew shakhmat ban ialam lynti ha kaban pynshlur ia ka jinglong nongialam ki kynthei bad ka jingiashimbynta ha ka bha ka miat ka imlang sahlang naduh ki snem 1931.
Ula ong ba ka Chutwakhu kala ai jaka ruh ia ki seng ki samla ba kin kiew shaphrang naduh u snem 1934 bad bynrap ba ka jingiadonlang ki Rangbah, ki Kynthei bad ki Samla hapoh ka shnong ka thaw kala long ka nuksa kaba bniah ia ka jong ka bor ka Shnong.
Haba kren halor ka jingkongsan ki shnong ki thaw, u Myntri Rangbah ula ong ba ka jingkhlain jong ka Meghalaya ka shong ha ki Shnong ki thaw bapher bapher bad kyntu ia ki nongshongshnong ba kin iatreilang ha ryngkat bad ka Sorkar ban nang pyntyllun shakhmat ia ka roi ka par ha ka District bad ka Jylla.
Ula pynpaw ruh ia ka jingsngewkmen ban iohi ia ka jingiaid ki jingpynkhreh na ka bynta ka Meghalaya Games ha Jowai ia kaba u la ong ba ka dei ka khep ka ban sah khana ia ka West Jaintia Hills. Ula ban jur ba ka jingkynshew ha ki jingtei ia ki madan kam dei satia tang ka jingpynlut hynrei ka dei ka jingkynshew ha ki samla, ki lawei jong ka Jylla.
U Myntri Rangbah ula aiti ruh ia ki cheque ba kot haduh T.21 lak (mar T.1 lak) sha ki 21 tylli ki Sports Club bad Association ka West Jaintia Hills District ba kin pynkhreh ialade na ka bynta ka Meghalaya Games ban wan.
Kiba la iadonlang ha kane ka sngi ki kynthup ia u Symbud Myntri Rangbah Bah Sniawbhalang Dhar, u MLA ka Jowai Bah Wailadmiki Shylla bad u MLA ka Amlarem Bah Lahkmen Rymbui.
