Shillong, Nohprah 28: Ka Nongrim Hills SC ka la lehkmen da ka jingjop ba 6-0 kol pyrshah ïa ka Ryntih FC ha ka OC Blue Shillong Premier League (SPL) 2024, kaba la long ha SSA First Ground, Polo.
Ïa ka OC Blue SPL la pynsangeh shipor namar ka jingleit ïashim bynta jong ki rang ialehkai ba mihkhmat ia ka Jylla Meghalaya ha ka Santosh Trophy bad namar ka aiom shuti hynrei kane ka lympung la wanphai biang ha ka sngi Saitjaiñ.
Ki nongthep kol jong ka Nongrim Hills ki long u Nickhil Lyngkhoi (10’), u Banshemphang Kurbah (38’, 67’), u Benjamin Diengdoh (55’), u Glennys Lynrah (81’) bad u Fashioning Syngkli (88’).
Kane ka dei ka jingjop kaba lai sien lynter jong ka club bad ka la lah ban thep bun tylli ki kol bad ka la jop da 4-3 kol pyrshah ïa ka Langsning FC, 5-2 pyrshah ïa ka Nangkiew Irat SC bad mynta ka la jop da 6-0 kol pyrshah iaka Ryntih.
Ha kawei pat ka liang, ka Ryntih ka dei ka kynhun kaba nyngkong eh ban pyndep ïa ki jingïalehkai Firt Leg kaba kut daka jingsngewdiaw ki nongykyrshan jong ka.
Ka la plie ïa ka jingjop ha u snem 2024 da kaba jop ïa ka Nongthymmai SC da 3-0 kol hynrei ki la ïaid shakhmat ban shah rem man la ka jingïalehkai bad hadien kata kam shym la lah ban thep kol ha ki lai tylli ki jingïalehkai ba la dep.
Ka jingïalehkai kaba sniew jong ki ka la paw ha baroh ki liang ha kaba ki nongïalehkai ba shakhmat kim shym la lah ban thep kol katba ïa ka jingïalehkai ba shadien ki khlem tehlakam haka jingshah thep Kol.
Mynta ka Nongrim Hills ka la kamai 13 poiñ, kaba ïaryngkat bad ka Mawlai SC bad ka Shillong Lajong FC kiba don ha khlieh duh jong ka Table hynrei ka Mawlai bad ka Lajong baroh ar tylli ki don ïa ki jingïalehkai ha kti.
Hadien ka jingsangeh shipor na ka bynta ka shuti snem thymmai, ka OC Blue SPL kan wan biang ha ka 4 tarik Kyllalyngkot bad ka jingïalehkai ba nyngkong kan long ha ka por 11:30 baje mynstep ha kaba ka Rangdajied United FC kan ïakhun pyrshah ïa ka Nongthymmai, ban bud sa ka Mawlai kaba dang bat ia ka nam lahduh pyrshah ïa ka Laitkor SC ha ka por 2 baje janmiet.
 2024, kaba la long ha SSA First Ground, Polo.){kind=link}