Shillong, Nohprah 28: Ka Hynniewtrep Youths’ Council, kala pynrem jur ia ka jingleh jong u Akash Sagar hapoh jong ka iingmane ha Mawlynnong bad ong ba kane ka long ka jingthombor ia ki riewngeit Khristan bad kadei ruh da ka jingthmu ban pynmih ia ka jingsngew pher niam ha ka jylla.
Ka kyrwoh na u President ka HYC Bah Roy Kupar Synrem ula ong, “Ka seng ka pynrem tyngeh ia ka jingleh khlem akor u ‘Akash Sagar’ hapoh ka iingmane ha Mawlynnong. Kane kadei ka jinghiar thma ïa ki riewngeit bad kiba don ia ka jingngeit ha ka niam Khristan bad katei kadei ruh ka jingpyrshang ban pynmih ïa ka jingïapher niam ha ka Jylla bad ban pynbor ïa ka mat ne ‘Agenda’ jongki heh paid ia kaba ym lah ban pdiang satia”.
Ka HYC, kala dawa na ki bor pulit ba ki dei ban kem mardor ia une u briew bad kiba don ryngkat lem bad u lada don bad dei ban pynthikna ba udei ban mad ia ka jingshah pynsajia ia ka jingleh ka jongu katkum ki kyndon jong ka aiñ. Dei ban pyni ia ka nuksa, da ki bor kiba dei khmih kiba don ha ka jylla ha kaba iadei bad katei ka jingjia khnang ba kum katei ka rukom leh kan ym iai bteng biang ha ki snem kiban wan bad ym dei ban don uno uno ruh uban don ia ka bor ban niewbeiñ ia ka niam Khristan ha ka jylla.
U President ka HYC ula kyntu ruh ia ka sorkar bad ia baroh kiba don bynta, khamtam eh ia kito kiba don bynta ha ka kam jngohkai ba kim dei ban khein sting ia katei ka rukom leh hynrei kidei ban pynsngewthuh ia ki paidbah mardor khamtam ia ki nongjngohkai kiba wan jngohkai ia ka jylla ba kin long kiba adkar ha kaba iadei bad ka jingsngew jong ki paidbah ka jylla, kiba don ha kano kano ka niam ne jingngeit bad dei ban don ruh ia ki kyndon treikam kiba dei ban leh ne ki bym dei ban leh haba leit jurip ia kino kino ki jaka jngohkai bad khamtam ia ki jaka niam kiba kongsan.
