Shillong, Dec 27: Ka BJP Meghalaya hynne ka sngi Thohdieng kala pynrem jur ia ka jingjia hapoh ka iingmane ha Mawlynnong, ha kaba uwei u riewshimet ula donkti ha ka kam kaba lah ban pynmong ia ka jingsngew jong ki Khristan ha kylleng ka jylla bad ka ri.
“Kum katei ka jingleh kaba tad dor ban pynpawnam kadei da ka jingthmu ban pyniaid shakhmat ia ka agenda lajong, tang ban pynmong ia ka jingsngew jong ki nongshong shnong kiba don ia ka rukom pyrkhat kaba dei kiba dei na ki niam bapher bad kaba lah ban pynmih ia ka jingiapher jingmut. Ia kane dei ban tehlakam ha kano kano ka dur ruh khamtam ha ka jylla kaba sngewsarong ia ka jingburom mar kylliang hapdeng ki niam bapher bapher, ka jylla kaba ki briew na ki niam bad jingngeit bapher ki iashimbynta naduh mynsiem ha kino kino ki jingialehkmen kaba ki ia pynlong” ong u Nongaiktien ka BJP u Bah M Kharkrang ha ka kyrwoh khubor.
“Ka BJP kum ka seng kala bat skhem ia ka nongrim ia ka jingburom ia baroh ki jait niam bad kaba ieng khlem ban iada ia ka jingiatylli ha ka ri bad ka ngeit skhem ha ka jingia ryngkat lang jong baroh ki niam. Ka long kaba kongsan ban pynpaw ba u Myntri Rangbahduh ka ri hi ula leit iashimbynta bad ki nongialam Nalang ha ka jingrakhe ia ka Christmas bad ialam ia ka ri ha ka jingrakhe ia ka khubor jong ka jingieid ha kylleng satlak ka pyrthei. Kano kano ka jingleh jong u riewshimet ne ka kynhun kaba pynkhein ia ka jinglong jingman jong ka jingsuk kaba la don lypa, ka long kaba iahap ban pynrem jur bad dei ruh ban shim da ki sienjam kiba dei” ula ong.
U Nongialam ka BJP ula kyntu ia ki nor pulit ban pynshitom katkum ki kyndon ain pyrshah ia u nongleh kam.sniew ban pynthikna ba kum.kitei ki jingleh kiba khyllah kin ioh ia ka jingpynsajia katkum.ki kyndon ain.
“Kum katei ka jingleh khlehbiej kaba long da ka jingthmu ban pynsaphriang ia ki khubor kiba bakla lyngba ka social media ka long ka bym don jaka ha ka imlang sahlang kaba la nang la stad bad dei ban pynkhuid noh phar ia ka khlem da pynslem shuh” ula ong.
