Shillong, Nohprah 17 : Ka Iingkashari Meghalaya High Court, ha ka sngi Nyngkong, kala bthah ia ka Sorkar Jylla ba kan pyndep noh ia ka jingthied jaka ban pynheh ia ka Shillong Airport bad ban aiti sha ka Airport Authority of India (AAI) khambha hapoh ka laibnai.
Haba pynmih ia ka hukum halor ka PIL, ka Iingkashari u Chief Justice IP Mukerji bad Justice W Diengdoh, kala ong “
Ngi don ka jingsngew ba ka por kala dei ban shim ia ki sienjam kiba thikna ban pyniar ia ka runway,ka jingshna ia ki jingtei bad kiwei kiwei ki jingdonkam bad baroh ki kam halor ka jingpynheh ia ka Shillong Airport”.
“Ngi bthah ia ka Sorkar Jylla ba kan shim ia baroh ki sienjam khnang ba ia ki jaka ba donkam ban shim dei ban thied noh bad ban aiti sha ka Airport Authority of India (AAI), khambha hapoh ka lai bnai naduh mynta ka sngi”.
Ka hukum kala ong ruh “Ngi bthah ia u Director General ka Civil Aviation ha ryngkat ka Airport Authority of India (AAI) ban mynjur bad pyntreikam ia ka plan, kaba lam sha ka jingpynheh ia kane ka kad liengsuin hapoh ka laibnai ba thied jaka bad aiti ia ka jaka sha ka AAI da ka Sorkar Jylla”.
Ka Iingkashari kala buh ban shong bishar biang ia kane ka mukotduma ha ka 14 tarik Iaiong, 2025 ban bishar ia ki sienjam bala shim da ki nongshah mudui.
La bthah ruh ia ka Airport Authority of India bad ia ka Sorkar Jylla ba kin aiti lang ia ka kaiphod halor ki sienjam ba kila shim.
