Jowai, Nohprah 13 : U Symbud Myntri Rangbah Bah Sniawbhalang Dhar ryngkat u MLA ka Jowai Bah Wailadmiki Shylla, ha ka sngi Thohdieng, kila buh maw nongrim ban tei biang ia ka Iawmusiang bad ban shna ia ki katto katne tylli ki surok kiba hap hapoh ka Jowai Constituency.
Ha kane ka jingialang buh maw nongrim, u Chief Executive Member (CEM) ka JHADC Bah Thombor Shiwat, ula pynpaw ia ka jingsngewskhem ba ka jingtrei ia ka Iew Iawmusiang kan sdang noh bad kyrmen ban shna pynbha noh ruh ia baroh ki iew ba shisien shitaiew kiba don ha kylleng ka Ri-lum Jaitnia.
Haba nyngkong, ia kane ka project (Iawmusiang) la bei tyngka sha ka JHADC da ka DoNER ha u bnai Naitung 2008 ha ka jingmang ba kot T.20 klur hynrei namar kiba bun ki daw, ki kam jong kane ka project kila sangeh noh. Kane kala lam sha ka jingiasoi MoU hapdeng ka JHADC bad ka Sorkar Jylla ha ka 24 tarik Nailar 2010 bad ba ka PWD kan shimti ha kaban pynthikna ban pyndep ia kane ka project.
Kane ka project kan ieng ha ka jaka ba 87773 sq meter bad kin don haduh 298 tylli ki dukan. Ka pisa bala mang ia ka project ka long T.25.6 klur.
U Bah Wailadmiki Shylla ula ong ba ka project ba sahteng jong ka Iawmusiang, kala pynijli bha ym tang ia ka Jowai hynrei ia ka Ri-lum Jaintia baroh kawei bad dei hadien ki jingialang bym lah niew shuh bad u Myntri Rangbah ka Jylla, Symbud Myntri Rangbah bad ka PWD, ka jingtei pat ia kane ka Iew kan sa sdang biang.
Ula kyntu ia ki Waheh Chnong, ki Sengbhalang bad ki paidbah ba kin iatreilang bad kyrshan ia ka project namar kat kum ki kyndon jong ka tender, ka jingpyntrei ia kane ka project ka dei ban dep hapoh ka 24 bnai.
Une u MLA ula pyntip ba ka pisa kaba la pynlut baroh ha kane ka project kat haduh mynta kala kot ia ka T.7 klur bad ka jingpynlut ia kane ka project kat haduh ban da pyndep ka long kumba T.20 klur.
Nalor kane, u Bah Wailad ula pyntip ba ka Sorkar kala mang ia ka song pisa ba T.50 klur ban shna pynbha ia ki surok bapher bapher hapoh ka Jowai constituency.
Haba ai jingkren, u Bah Sniawbhalang Dhar ula ong ba ka jingtrei jong ka Iawmusiang Complex kala dei ban dep hapoh u 2021 hynrei namar ki mukotduma, ka jingtrei kala sahteng noh.
Ula pynpaw ia ka jingsngewskhem ba u contractor jong ka project Bah Pyrkhat Hinge un lah ban pyndep ia ka project hapoh ka posa kaba la buh, kaba long 24 bnai.
U Bah Sniawbha ula pynpaw ruh ba ha kiba bun ki khep, ki paidbah kiju kynnoh bad pynrem ia ka Sorkar ha ki social media hynrei ki kyntait pat ban kubur ia ki kam pynroi kiba ka Sorkar kala wanrah ha kine ki khyndiat snem bala leit.
U pyntip ba dei tang ka Meghalaya napdeng ki Jylla ha ka thain Shatei Lam Mihngi kaba la ioh jingithuh na ka Sorkar Pdeng ba ka pyntreikam pura ia ka song pisa ba ioh n aka External Aided Project (EAP).
Ula iathuh ba naduh u snem 2023, ka Sorkar Jylla kala wanrah ia ki kam pynroi ym duna ia ka T.2000 klur ha baroh kawei ka ri-lum Jaintia.
Ha kane ka sngi, la plier uh ia ka Building thymmai jong ka Circuit House ha Jowai.
