Shillong, Nohprah 03: Hashwa ban kut noh ka jingialehkai Football, ha ka minit kaba khatduh u Zothanpuia Bawihtlung ula thep ia ka kol lyngba ka Freekick kaba la pynjop syndon ia ka Nangkiew Irat SC da 1-0 ia ka Ryntih FC ha ka OC Blue Shillong Premier League 2024 kaba la long hynne ka sngi Baar ha SSA Stadium, First Ground, Polo.
Hashwa ba u Refree yn pynkut noh ia ka jingialehkai u Zothanpuia ula thep ia ka kol ha ka minit kaba 90+2 lyngba ka Free Kick kaba itynnad bha kaba la leit rung beit shapoh kol watla u nongap kol ka Ryntih u Eric Nongkhlaw ula rynsied halor suiñ ban iada ia katei ka bol hynrei ym shim la lah ban leh eiei.
Kane ka jingjop kala pynlong ia ka Nangkiew Irat ban kiew sha ka kyrdan kaba 5 da kaba iakhaid haka jingioh da 9 point bad ka Rangdajied United FC kaba dang don sa kawei ka jingiakhun ha kti. Kine ki artylli ki kynhun kim pat iakynduh ban iakhun pyrshah hynrei ka Rangdajied kala khlain ha ka jingioh ban thep kol.
Katba ka Ryntih kala don sha trai da kaba ioh tang 3 point bad kane kadei ka sien kaba 6 ba kan mad iaka jingrem.
Haba phai biang sha ka jingiakhun, ka Ryntih kala ialehkai bha haka Kylla Step bad ha ka Kylla Miet hynrei wat hapdeng ka jingioh ia bun tylli ki kabu kam shim la lah pat ban thep kol.
Ka Nangkiew Irat ruh kala ialehkai bha hynrei kam shym la lah ban thep kol hynrei dei ha ka minit kaba khatdu hshwa ban wai ka jingialehkai ba Zothanpuia ula thep ia ka kol jong ka jingjop lyngba ka Freekick kaba long ruh ka kol kaba nyngkong ia u ban thep ha ka OC Blue SPL.
Ka Nongrim Hills SC kan iakhun pyrshah ia ka Langsning FC ha ka sngi Thohdieng ha ka por 11:30 mynstep bad hadien kane ka Nongthymmai SC kan iakhun pyrshah ia ka Nangkiew Irat ha ka por 2:30 mynsngi.
