Shillong, Nohprah 03 : U President ka AITC Meghalaya bad MLA ka Nongthymmai Bah Charles Pyngrope ula ban jur ia ka jingdonkam ban buh ia ki rehabilitation centre ha man ki district jong ka Jylla ban lah eiei halor ka jingnang jyllei ki nongdih droks ha ka Jylla.
Haba iakren bad ki nongthoh khubor ha ka sngi Ba-ar, u Bah Charles ula ong “Nga tharai ngi la iakren sani bha ia kane ha ka Dorbar synrai jong ka Iingdorbar Thaw Ain bad ka dei ka kam kaba sngewkhia bad katto katne ki jingai jingmut, kiba la mih na ka Liang Pyrshah ki dei kiba iahap bha, ha kaba ngi donkam ban tei ia ki jingtei ba kongsan ha baroh ki district bad ban ai jaka sah ia ki nongdih droks ba kin ioh jingsumar. Ngim lah ban shanaiah tang ha ki centre ki riew shimet. Kane ka dei ka mat, kaba hap ban shikhia bha da ka Tnad bad ka Sorkar baroh kawei”.
Ula ong ba ka Sorkar ka hap ban mih shakhmat bad ha ka lynti kaba sted bha naba ki jingtei ia ki jingtei ka long kaba kongsan namar phi donkam ia ka iing ban pynsah ia ki la kumno kumno ruh kumba shisnem.
Haba iaroh ia ki sienjam bala shim da ka Sorkar ban tehlakam ia u droks, u Bah Charles ula ong “Hynrei donkam ban pynsted ia ki kam ki jaka haba khmih ia ka jingpur sted jong kane ka jingeh”.
Haba kylli, une u MLA ka Nongthymmai ula ong “Nga khmih ia ka ha ka lynti kaba pher. Ki don ki Seng, kiba trei hok bad nga ju iakren bad ki ruh, kiba la ai ka jingshakri nala ka jong ka pla khlem ka jingiarap na ka Sorkar”.
Hynrei, ka Tnad ka lah ban iatehlok bad kine ki Seng hynrei ban buddien ia kaei kaba ki leh bad ban buh jingthoh lut ia kiei kiei baroh. Phim lah ban shu ai ha ki ia ka pisa bad shu khapbriew noh ia ki khmat bad ban khmih lynti ba la pyndonkam hok ia ka pisa.
“Haba ong ia kane, ngam don jingartatien ha ka jingmut jingpyrkhat jong nga ba ki don ki seng ha Shillong ha ka Jylla baroh kawei, kiba trei ia kane ka kam khlem kano kano ka pisa ba ki ioh bad kin nym lah satia ban pynduh ia ka jingeh” ula ong.
