Shillong, Nohprah 02 : Ka Iingkashari Meghalaya High Court kala hukum ba dei ban pyndep noh hapoh ka 31 tarik Lber 2025 ia ka jingbishar jong ka Tnad (Departmental Procedding) pyrshah ia u Pulit Assistant Inspector General (AIG)Bah GK Iangrai halor ka jingkynnoh donkti ha ki kam bamsap.
Haba pynmih ia ka hukum hynne ka sngi Nyngkong, ka Iingkashari kaba kynthup ia u Chief Justice IP Mukerji bad Justice W Diengdoh kala ong “ Ka Iingkashari ka don jingsngew halor ka jingkynnoh ba ki borkhmih kim shym la peitngor bha ban leh eiei haba iadei bad kane ka jingkynnoh leh bakla da une u Heh Pulit”.
Kala ong “Ka Iingkashari kala tuklar. Ngi shem ba ka Tnad kala shim kala shim ia ka sienjam ha kine ki arsnem, kumba kwah da ka Iingkashari, kumta kane ka kam kam donkam shuh ban dang hap bishar da ka Iingkashari, ha ka jingsngew jong ngi” bad bynrap “Ngi pynwai noh ia kane ka PIL da kaba hukum ba ia ka jingbishar jong ka Tnad, dei ban pyndep noh kham kloi kat kaba lah bad lehse hapoh ka 31 tarik Lber, 2025. Ngi bthah ruh ban pyndep noh ia ka mutkoduma kam bymman hapoh kane kajuh ka por”.
U Bah Iangrai ula shah kynnoh ba u thied sopsop haduh 29 tylli ki kali na ka bynta ka Tnad Pulit, bad buh ia kine ki kali halade bad pyndonkam bakla ia ki mynba u dang bat ia u Assistant Inspector General of Police (AIGP).
Ia kane ka hukum la pynmih ruh hadien la pyntip sha ka Iingkashari da u Advocate general ba napdeng ki 43 ngut ki nong ai sakhi ban pyndep ia ka jingtohkit ka Tnad, 41 ngut la dep ban shong bishar katba arngut ym shym la pyndep. Kumta, la khein ba ka jingbishar ia ki nongai sakhi kala dep pura.
“Kila pyntip ruh ba ia ka charge-sheet ha ka mukotduma kam bymman ruh lah dep ban pynkhreh pyrshah ia une u Ophisar. Ua shah kem, ula shah set bad mynta ula ioh jamin.
Ngi la shim ia baroh kine kiei kiei ha ka jingbishar. Ngi la don ia ka jingsngew ba ka jingthmu jong kane ka PIL kala dep urlong” ong ka Iingkashari.
“Kino kino ki briew kiba sngew shah ktah ki lah ban leit mudui pyrshah ia ka hukum sha kano kano ka Iingkashari ba ki lah ban leit” kala bynrap.
 pyrshah ia u Pulit Assistant Inspector General (AIG)Bah GK Iangrai halor ka jingkynnoh donkti ha ki kam bamsap.){kind=link}