Shillong, Naiwieng 28 : Shen ka Pynursla kan sa ioh noh ia ka Sub Divisional Hospital, ka ban ai jingshakri ia ki phew tylli ki shnong jong ka thain Ri-War Mihngi bad ki shnong ba marjan.
Kane ka Sub Division Hospital kala wan ha ka dur jong ka jingkyntiew kyrdan ia ka Pynursla Community Health Centre (CHC), ia kaba la buh mawnongrim ha ka sngi Palei da u Symbud Myntri Rangbah ka Jylla bad MLA ka thain Bah Prestone Tynsong ha ryngkat ka Myntri ka Tnad ka Koit ka Khiah Kong Ampareen Lyngdoh.
Nalor kane, u Symbud Myntri Rangbah ula plie paidbah ruh ia ka First Referal Unit ne FRU ha kane ka CHC nalor ka Operation Theatre lane ka jaka puid ia ki nongpang, ban nang pynbun ia ka jingshakri ia ki paidbah ka thain Ri-War.
Ia kane ka prokram la pynlong ha phyllaw jong ka Pynursla CHC ha ryngkat ka jingdonlang u Principal Secretary ka tnad ka Koit ka Khiah u Sampath Kumar, ka Sub-Divisional Officer Pynursla, Kong EL Warjri, ka DHS (MI) Dr. JS Momin, DHS (MCH&FW) Dr. N Kharsohnoh, Rangbah Shnong Urksew Wahpathaw, Bah Archallson Lyngdoh, ki doktor, ki nos, ki ASHA bad ki paidbah nongshong shnong.
