Shillong, Naiwieng 27 : Ka kurim u Myntri Rangbah ka Jylla Dr Mehtab Chandee A Sangma ha ka sngi Balang, kala bmai smai kum ka MLA ba thymmai ka Gambegre Constituency haba kut jingmut ban leh eiei halor ki kam ba iadei bad ki jaka sumar, ka bording elektrik bad ki surok kum ki kam ba hakhmat duh jong ka.
Ia ka Dr Mehtab la pynbam smai da u Lamphang ka Iingdorbar Thaw Ain Thomas A Sangma ha ka jingiadon ryngkat u Myntri Rangbah bad National President ka NPP Conrad K Sangma bad ki nong ialam ba hakhmat bad nongkitkam ka party.
Ka Dr Mehtab kan dei ka MLA kynthei kaba saw ha ka Iingdorbar Thaw Ain hadien ba ka pynliem ia ka MDC ka TMC Sadhiarani kaba wan ba-ar da 4594 vote ha ka elekshon shiteng samoi ba dang shu dep.
Haba iakren bad ki lad pathai khubor, kane ka MLA ba thymmai ka Gambegre kala ong “ Nga sngew ba ka long ka kam kaba eh khyndiat namar ka kam sain pyrthei ka dei kaba dawa shibun bad nga kyrmen ba nga lah ban leh ia kiei kiei kat kum ka jingkhmih lynti ki paidbah”.
Kala kular ban leh eiei halor ki kam kiba ktah ia ki paidbah jong ka constituency khamtam haba iadei bad ka jingpynbiang ia ki jaka sumar, ki surok bad ka bording elektrik.
“Ha ki khyndiat bnai ba nga la don ha kane ka constituency, nga nga iohi b aka thain ka dei kaba dang sahdien haba nujor bad kiwei pat ki bynta ka Ri-lum Garo bad lehse ki don shibun ki daw ia kata hynrei nga sngew ba ki dang don ki jingdonkam ba kongsan eh kiba hap ban leh eiei kum ki jaka sumar, ki surok bad ka bording elektrik namar ki don don bun ki shnong ki bym pat don bording, ki don bun ki skul kiba la jot bad ki don bun ki shnong ki bym pat ioh surok-Nga sngew ba kine ki dei ki kam, ki ban pynmyntoi bha ia ki paidbah bad nga sngew ba ngan shimkhia nyngkong eh ia ki” ong ka Dr Mehtab.
Haba pynpaw ba ki paidbah ka Gambegre kila jied ia ka roi ka par, kala ong “Hooid, nga sngew ba ka dei ka jingkwah ba ki paidbah ki lah ban ioh bad kila iohi ha ki snem bala leit noh ba duna bha ki kam pynroi kiba wan bad kumta kila kwah ban iadonlang noh bad ka Sorkar bad nga sngew ba ka dei kane kaba kila jied”.
Haba kylli, kane ka MLA thymmai kala ong “Hooid phim lah ban khmih lynti ia kajuh ka jinglong namar nga dei ka briew kaba iapher na kaei kaba long u Saleng. Ngan shim ia ki ishu ym ha ka lynti kaba shim da u Saleng. Nga tharai ki ishu ki dei jong ka thain, ki ishu jong ka constituency kiba kham kongsan, kiba don jingiadei bad u paidbah”.
