Shillong, Naiwieng 24 : Ka Kynhun rwai ba la rim tam ha ka Jylla Niam Bah Shillong-ka St. Cecilia Choir, ka la rakhe ia u mawjam ba Shispah Snem naduh ba la seng ia ka ha u 1924 da u Sohblei Elias Hopewell Elias Khariong Sohliya, uba dei u ruh Phadar ba nyngkong napdeng ki khasi.
Ia une u mawmer 100 tylli ki snem jong ka St Cecilia Choir la nguh ka dem ia u Blei da ka Mass Bakhuid ba la pyn kyntang da u Bishop Wilbert Marweiñ, ka Jylla Niam Nongstoin ha Iing Mane Bah Shnat Niam Laitumkhrah.
Ha katei ka Mass Bakhuid la synran da u Sohblei Bernard Laloo Parish Priest ka Iingmane Bah u Sohblei Robert Majaw, u Sohblei Hilarious Lamare Parish Priest ka Shnat Niam Marian Jowai bad kiwei ki Lyngdoh Sohblei.
U Bishop Wilbert Marweiñ haba ai jingkren ha lyngkhuh pynkut ia ka 100 snem, u iathuh ba ka dei ka jingkyrkhu ia ka mynta bad ka jingjynjar ia ka mynnor ban Seng.
Ha ka Mass Bakhuid, ka St. Cecilia Choir ka rwai pynshit rhem ia ki paid u Blei kiba wan sngap.
Hadien ka Mass Bakhuid u Bishop Wilbert Marweiñ, u la pyllait paidbah ia ka kot sahkynmaw tympang bad ka jingleh burom.
Haba iaphai iakyrtiang dien ia ka mynnor ia ka kynhun rwai Cecilia naduh ba ka St. Cecilia Choir ka dei ka kynhun rwai banyngkong eh jong ka Balang Katholik hapoh ka Shillong Archdiocese. La seng ia ka ha u snem 1924 ha u Lum Tyngkong (kaba don mynta ka ingmane Bah bad ka Grotto). la kane ka kynhun rwai la seng hapoh ka jingialam jong u Samla H.Elias Khariong ryngkat bad u Bah Leonidas bad kiwei kiwei.
Ki la ai nam ha ka Cecilia Bakhuid kaba dei ka Nongda jong ki nongput nongtem ia kane ka kynhun rwai la tip kum ka St. Cecilia Choir. Ka jingsdang ia kane ka Choir ka la long hadien ka jingsdang ka Seng Salesian ia ka Mission ha kane ka įylla niam ha u snem 1922 ha kaba u most Rev. Louis Mathias SDB DD u la long u nongpeit nongkhmih ia ka jyllaniam hadien ba la ia ieh noh ka Seng Salvation na ki daw jong ka Thma.
Ka khana pateng ba la sdang ia ka Choir da u samla H. Elias ha ka por ba u dang long tang u khynnah Samla.
U snem 1948 U Parish Priest ka IIngmane Bah u Fr. Foglia u Choir Master dei u Bah Severine Wilfred Nongkhlaw bad Bah Cyril D Lyngdoh bad Bah Martin Khongwir.
Ha ki snem 1950 ter ter haduh u 1981 ki choir Master ki long u Fr. Tarsisius Resto Phanrang bam kwai ha Iing u Blei, u Fr. Robert Majaw u shimti ban pyniaid naduh u 1982 haduh 1984 naduh u 1989 haduh 2013 u Bah Polycarpus Ksoo ba la khlad noh mynta la shimti da u Samla Damien Jeffrey Jyrwa naduh u 2017 haduh mynta 2024.
Haduh ka st. Cecilia Choir ka dang don ki riewdkhot barim kiba dei naduh u snem 1958 kiba dangim haduh mynta.
Ha u snem 1990 da ka Jingwan jong ka Senteneri 100 snem ka jingngeit ha Ri Lum Khasi ka St Cecilia Choir ka la long ka jingkyndit thiah ban pynkha biang sa Shisien kane ka kynhun rwai ka la plung biang ha ka 15 tarik u Naitung.
Kumta ha ka 9 tarik u Naiwieng ka la don ka jingpynkut ia ka Senteneri 100 snem ka kynhun rwai Cecilia ka la rwai ha ka Proseshon Bah Iukharist.Ka kynhun rwai kaba la rim tam ha ka Jylla Niam Shillong bad ha ka thaiñ shatei Lam Mihngi ka Ri India ka “Saint Cecilia kaba la ju leit rwai kylleng ka thain Shatei Lam Mihngi kum ha Arunachal kata 1992, ha ka Centanary Tyrna, ha Pynursla bad kiwei ki jaka shaduh kari Bangladesh ha Dhaka.
Dang 10 snem mynshuwa ka St. Cecilia ka la rakhe ia jingdap 90 snem ha ka 22 tarik u bnai Naiwieng 2015 ha Iing Mane Bah. Mynta kane ka kynhun rwai ka la kiew stet da ka don jong ka Shlem jinghikai ia ki khynnah rit ban bteng ia ka longdien ha ka jingialam u President Bah M.D Tmar bad Choir Master u samla Damian J Jyrwa bad Spiritual Director u Sohblei Bernard Laloo.
La pynkut noh ia ka Sentineri 100 da ka jingpynhiar Lama da u Archbishop Victor Lyngdoh shwa ia katei la pynlong ia ka prokram pynkut burom ia ki nongialam, ki riewdkhot barim bad Bathymmai bad ka jingainam ia u syniang ba ki dkhot barim ba ki la noh bad bud da ka jingkyrkhu na u Archbishop.
