Shillong, Naiwieng 23: Watla ka kynhun ialehkai Cricket jong ka Meghalaya kala don ia ka jingkyrmen ban tied haduh ban da kut ha ka sngi kaba khatduh jong ka U-19 Men’s Cooch Behar Trophy Elite Group A pyrshah ia ka Delhi ha MCA Ground, Polo hynrei katei ka jingangnud kala pulom noh haba ka Delhi kala pynkhyllem lut ia ki nongtied ka Meghalaya kiba la kamai 172 run bad ka Delhi kala jop suk da 191 run bad kawei ka Inning.
Haba bteng ban tied biang hynne ka sngi saitjaiñ, ka Meghalaya kaba la kamai lypa 141 run bad 5 wiket, hynrei kala lah ban kamai sa tang 31 run bad kane ka jingialehkai kala kut noh tang hapoh shi kynta.
Ia kitei baroh 10 wiket la ioh khur da 2 ngut ki nongkawang bol ka Delhi kiba kynthup ia u Udhav Mohan uba la ioh wiket bad ai 59 run bad haba kyllum lang ha ka jingleit kawang bol arsien ula ioh khur 9 wiket, katba u Arnav S Bugga uba la ioh 5 wiket bad ai 46 run bad ha ka jingleit kawang bol baroh arsien ula ioh khur 8 wiket.
Ka Delhi kala tied tang shisien bad kala kamai 623 run bad hap tang 5 wiket, u Arnav ula kamai 114 run, u Dhanya Nakra ula kamai 130 run bad u Aaryavir Sehwag uba long u khun jong u nongialehkai cricket ba pawnam ka ri u Virender Sehwag ula kamai 297 bad ula duna 3 run ban kynjoh ia ka 300 run.
Ia ka Meghalaya, dei tang u Gaurav Narleng uba la kamai 95 run ha ka jingleit tied ha ka sien kaba nyngkong, katba u Kshitij Singhania ula kamai 62 run.
Ka kynhun ialehkai jong ka Meghalaya kan don hi ha la ka jong ka jylla ban pynkhreh ban iakhun pyrshah ia ka Baroda naduh ka 28 tarik u Naiwieng.
Ka Baroda kala jop ha baroh 3 sien ki jingiakhun ki jongka bad kadei ka kynhun kaba khlain kaba ka Meghalaya kan hap ban iakhun tyngeh bha.
