Shillong, Naiwieng 22: Ka Meghalaya kala jam shaphrang ban ioh rung sha kawei pat ka Round jong ka Senior Men’s National Football Championship jongka Santosh Trophy 2024-25 da kaba pynrem ia ka Nagaland da 3-0 ha ka jingiakhun ha ka sien ka baar ha ka Group E kaba la long ha Nalbari, Assam hynne ka sngi Thohdieng.
Ha ka jingiakhun kaba nyngkong ka Meghalaya kala pynrem ia ka Arunachal Pradesh bad mynta kala bteng biang ban khur iaka jingjop da kaba pynrem ia ka Nagaland bad mynta ka Meghalaya ka sah sa tang kawei ka jingiakhun kaban long pyrshah ia ka Assam.
Hynne ka sngi u Donlad Diengdoh ula thep ia ka kol ha ka 21 minit naka bynta ka Meghalaya bad tang hadien 5 minit u kapten ka Meghalaya u Fullmoon Mukhim ula thep ia ka kol ha ka 26 minit.
Baroh ar ngut ki Coach jong kine ki ar kynhun kila pynmih bujli ia ki nongialehkai bad u Fairming Suting uba la ioh mih hadien ula ioh thep ia ka kol ha ka minit kaba 87 ia ka Meghalaya.
Ka Nagaland dang ha ki 2 sngi kiba la dep, kala pynliem ia ka Assam hynrei hynne ka sngi pat ka Assam kala pynrem ia ka Arunachal da 4-0.
Ka Meghalaya kan ym lah ban khein sting ia ka Assam haka jingialehkai ka ban long ha ka sngi u Blei bad ka Meghalaya ka donkam tang ban shu iakhaid bad ka Assam ban pynthikna ba kan long ka kynhun kaba dei ka lahduh haka Group ban ioh rung sha kawei pat ka round jong ka Santosh Trophy.
Ki nongialehkai ka Meghalaya mynta ka sngi ki kynthup ia u Siwel Rymbai (GK), Overkindness L Mawnai, Arlangky Nongsiej, Donborlang Nongkynrih, Wanboklang Lyngkhoi, Aibiangmame Nongneng, Kevin Rymbai (sub Fairming Suting 63′), Robertson Khongriah (sub Aenam Jyrwa 90’+4), Fullmoon Mukhim (sub Dibormi Kassar 90’+4), Damanbhalang Chyne (sub Baiaikara Swer 76′), Donlad Diengdoh (sub Khrawkupar Jana 63′).
