Imphal, Naiwieng 18: Ki kynhun bapher bapher na ka thain Imphal Valley ka Jylla Manipur, ki la pynjur ïa ka jingïakhih pyrshah ïa ka Sorkar Pdeng, da kaba kynnoh ba kam shym la lah ban tehlakam ïa ki jingkulmar bad ki jingia umsnam kiba dang ïai bteng haduh mynta.
Kine ki kynhun bapher bapher ki la sdang da ka ba khang ia ki ophis bad ki jaka treikam jong ka Sorkar Pdeng.
Ha ka sngi nyngkong, ki paidbah ki la mih sha surok, da kaba pynpaw ia ka jingbitar bad jingsngewsih jong ki.
“Ka jingshah pyniap dang shen jong ki khynnah rit bad ki kynthei ka la pynkyndit ïa ki paidbah ka Manipur. Ka paw shai ba ka Sorkar ka la pulom ban ïada ïa ki jingim briew bad ki jingdon jingem” ong uwei u dkhot ba iakhih.
“Kane ka jingkhangdam (Lockdown) ka dei ka dak jong ka jingïakhih. Lada ka Sorkar kam leh stet ban pynbeit ia ka jingeh, ngin pynjur ia ka jingkhih jong ngi” u la maham.
Kum ki sienjam ban tem ioh mih ki jingkulmar, ki bor Sorkar ki la pynjari daka Curfew ha Imphal East bad Imphal West ban wanrah biang ïa ka shongsuk shongsaiñ.
Ka jingkulmar bad ka jingia umsnam ka la nang jur hadien ka jinglap ia ki hynriew tylli ki met iap, kynthup ia ki kynthei bad ki khynnah, ha ka thain Jiribam.
Ka jinglong jingman ka la nang kham sniew hadien ba ka dur jong ka met jong kawei ka kynthei, kaba la ioh tam na ka wah Barak, ka la saphriang ha ki social media, kaba la pynmih ia ka jingbitar kaba jur.
Hadien kine ki jingjia, la kem ïa 25 ngut ki briew na kylleng ki district Imphal East, Imphal West, bad Bishnupur namar ka jingdonkti jongki ha ka jingkhynra bad thang ding.
La iohi ruh ba kala don ka jingshah thombor ia ki iing jong ki Myntri, ki MLA, bad ki nongialam sain pyrthei hapoh ka Jylla.
Na ka liang jong ki shipai Indian Army bad Assam Rifles ki la pynjur ia ka jingkhynra bad haka 17 tarik, u Lt. Gen. A. S. Pendharkar, GOC, Spear Corps, u la leit sha katei ka thaiñ ban bishar bniah ïa ka jinglong jingman ha ka liang ka jingshngaiñ bad ban ïakren bad ki shipai kiba don ha katei ka jaka.
Ki la pynlong ia ka Flag March ha ki jaka ba kongsan, ba kynthup ia ka Sanjenthong, ka jingkieng Khurai Lamlong, bad ka Thoubal, ban pynshngain ia ki nongshong shnong bad ban pynneh ia ka jingsuk.
