Shillong, Naiwieng 12 : Wat hapdeng ki jingkyrmen ba un wan phai noh sha Campus hadien ka jingjah rngai wat hapdeng ka jingpahara ki samla pule ia ki khyrdop, u Vice Chancellor ka North Eastern Hill University (NEHU) Prof PS Shukla, ha ka sngi Nyngkong, ula pyniaid ia ka jingialang jong ka Executive Council (EC) bala leh Online ban shim ia ki rai ba kongsan.
Haba iakren bad u nongai khubor, u Vice Chancellor ula pyntip ba ki rai kiba long kat kum ki jingdawa jong ki samla pule kiba iakhih, la shim ha ka jingialang jong ka EC ba long ha ka sngi Nyngkong.
Ki samla pule ba ialam da ka NEHUSU bad kyrshan da ka KSU-NEHU Unit, kila pynlong ia ka jingshah thngan kaba la iaid mynta sha ka sngi kaba 8 hakhmat ka Ophis u Vice Chancellor. Ka jingdawa ka kynthup ia ka jinghiar shuki u Vice Chancellor, ka jingwengkam ia u Registrar bad Deputy Registrar nalor ka jingthung ia ki Pro Vice Chancellor ha Shillong bad Tura Campus.
“Ki rai bala shim ki dei kat kum ka jingdawa ki samla pule. Ka jingdawa ba nyngkong eh ka dei halor u Registrar bad Deputy Registrar. Ngi la iaid kat kumka lynti treikam. Ngin sa thung ia ka jingtohkit” ula ong.
Halor ka jingthung ia ki Pro Vice Chancellor ula ong “ Khlem pep, ngin sa sdang noh ia ki kam ban thung Pro VC”.
Ha kajuh ka por, ula kyntu ia ki samla pule ba iakhih ba kin pynsangeh noh ia ka jingshah thngan.
“Nga kyrpad ia ki samla pule, sngewbha sngewbha weng noh ia ka jingiakhih. Ngi la leh ia ki kam ki ban pynmyntoi ia ki samla. Ym tang kawei ka kam hynrei kiwei kiwei ruh ki kam” ula ong.
U Vice Chancellor ula sah mynta ha kawei ka jaka ka bym lah ban tip bad ula pyniaid ia ki kam jong ka University lyngba ka google meet, email bad whatsapp.
Ula phet na campus ka University ha ka miet sngi Saitjain, ka miet kaba ka Iingsah bad ka kali jong u, kala shah lun maw ha ki riew runar.
Hynrei, kam shym la shai pat la ka jingioh phet jong u kala jia hashuwa lane hadien kane ka jingshah hiar thma.
Kat kum ka jingong ki Pulit, u VC um shym la don satia hapoh ka quarter ha ka por ba shah lun maw.
