Shillong, Naiwieng 11 : Ki nongtrei Non-Teaching Staff kiba don ha ka shatri jong ka North Eastern Hill University Non-Teaching Staff Association (NEHUNSA) kila ai ka jingkyrshan ba pura ia ka jingiakhih shong shah thngan jong ki samla pule (NEHUSU) halor ka jingdawa ban hiar shuki mardor u Vice Chancellor Prof PS Shukla.
Ia kane ka rai la shim ha ka jingialang General Body ba kyrkieh, kaba la pynlong hynne ka sngi Nyngkong.
U President ka NEHUNSA Dr WR Synrem ula ong “Ka NEHUNSA kam kwah ban iohi ba ka University kan dei ka madan hikai ia ki Ophisar ba thungkam. Ha kawei ka liang, ngi khmih lynti ba ki Ophisar ba bat ia ka kyrdan kaba heh ki dei ban btin lynti ia ki Nongtrei kat kum ki Rule bala mynjur da ka Sorkar India”.
Ula kynnoh ba naduh ba wan shimti une u Vice Chancellor ba mynta, baroh ki kam hapoh ka University kila thut lut n aka daw ka jingbym nang jong u ban trei bad jingbym tip sap. Kum ki nongtrei Non-Teaching Staff kiba don bynta beit beit bad ka kam pyniaid ia ka skulbah, ki bynniaw jur halor ka jingslem ban pyniaid ia ki files, u soh uba mih ka dei ka jingslem ban pyniaid ia ki kam ba man ka sngi ha ka University.
“La ioh kumba u Vice Chancellor ula wan sha kane ka University ban shah hikai, kaba ym shym la khmih lynti kum u Khliehduh ha ka Ophis” ong u Dr Synrem.
Haba pynpaw ba ka interview ia kane ka Statutory Post (s) jong ka University la leh ha Guwahati, ha kaba u Vice Chancellor ula pynpaw ba ka dei namar ka jingdonkam kyrkieh ban thungbriew ha kine ki kyrdan, u President ka Association ula ong “Hynrei kaba pynshaiong ia ngi ka long, ka shuki Controller of Examination kaba la kynthup lang ha ka Interview, la shah ban wan trei haduh 6 bnai hadien ba tyrwa ia ka jingthungkam sha u”.
‘Dang shen, ia u Deputy Registrar u bym nang bha ban kren English, la shut hung watla ka ktien ba pyndonkam ha ka University ka dei ka ktien English. Kane kala ktah bha ia ka jingtreikam ba man la ka sngi jong ka Ophis” ula bynrap.
Nalor kane, u Dr Synrem ula pyntip ia ka jingsniew jong ki surok hapoh ka campus, ka bym ju jia satia naduh ba seng ia ka University. Ia kane ka kam ruh la dep iakren bunsien bad u Vice Chancellor, hynrei ym shym la leh eiei haduh mynta mynne.
Ula ong ba ki quarter bala ai sha ki Nongtrei ruh ki dei ki bym sumar da ka University bad ki nongsah ki hap ban pynlut nap la lajong lada donkam ban leh ia ki kam maramot la ki dei kiba rit ne kiba heh wat hapdeng ka jingkhate ia ka House Rent Allowance (HRA) manla u bnai.
Ki street light, kiba long kongsan bha ha ka por mynmiet, kim shym la treikam satia, kaba buh ha ka jingbym shngain ia ki briew ba sah ha ka campus kynthup ruh ki samla pule.
Nalor kane, u Dr Synrem u pyntip, ‘Dang shen, kat kum ka RTI ba ioh pdiang, la kren shai ba ka jingthungkam Campassionate ha ki Ophis ka Sorkar Pdeng ka dei ka khlem pynsangeh satia hynrei ka University kan dang ban pynmih jingpynbna ia kane”.
“Ka Medical Advance, kaba donkam ban ai hapoh 10 sngi kat kum ka rule ka Sorkar India @90% na ka jinglut bala mang, la pynslem ban ai sha uwei na ki nongtrei uba don hapdeng ka jingshitom jur. Kane ka jingpynslem haduh palat shibnai kala wanah ia ka jingeh ia une u Nongtreikam bad ia ka Iing ka sem jong u. Kane ka pyni ia ka jingbym tip ia ki rule bala buh na ka bynta kane ka kam” ula ong.
