Shillong, Naiwieng 10: U Myntri Rangbah ka jylla u Conrad K Sangma hynne ka sngi, ula pynbna ba ka sorkar jylla kan ai T.20 Lak sha ki bahaiing bahasem jong u Sepoy Aibok Madur u shipai jong ka 10 Batallion jong ka Assam Regiment uba la khlad noh, da kaba len lade ia la ka jingim ha Siachen ha ka 7 tarik u Naiwieng.
U Myntri Rangbah ka jylla ula pynbna ia katei ha ka rynsan social media ka jong u hynne ka sngi u Blei.
Ula pynpaw ruh ia ka jingsngewnguh ia ka jingshlur jong une u shipai uba aiti iala ka jingim haka jingshakri ha ka kam ban iada ia ka ri ha Siachen.
“Ngi ai khublei ïa ka jingshlur jong u Sepoy Aibok Madur ka Assam Regiment, uba la aiti ïa ka jingim haka kam jongu ha ka 7 tarik u Naiwieng, 2024, ha Siachen. U Sepoy Madur uba na ka shnong Mawbri, ha Ri Bhoi District jong ka jylla Meghalaya, ula pyni ïa ka mynsiem ieid ri kaba shisha” la ong u Myntri Rangbah.
Ula ong, ba ka jinglen lade ka jongu kan long kaei kaei kaba yn ym lah ban klet. Ngi burom ia ka jingaiti ka jongu bad ngi kynmaw ia ka jingaiti lut jongu na ka bynta ka ri ka jong ngi.
“Ka jingsngewlem jong ngi, ka leit sha ka iing ka sem jong u Sepoy Madur bad ngi ieng ha ka jingiatylli bad ki ha kane kum kane ka khyllipmat jong ka jingsngewsih. Ka sorkar jylla ka ai ka jingkyrshan kaba pura bad ka jingsngewlem ia katei ka longiing kaba la duh noh ia u Sepoy Madur” la pynpaw u Conrad bad ka bynrap “Ai ba ka jingshlur bad ka jinglen lade jong u Sepoy Aibok Madur kan ai mynsiem ia ki pateng ban wan bad ba ka matti jongu kan im junom ha ki dohnud ki jong ngi”.
