Shillong, Naiwieng 10: Da ki hajar ngut ki riewngeit ka Balang Catholic hynne ka sngi u Blei, kila mih ban iashimbynta ha ka Eucharistic Procession kaba ju long man la u snem ha ka Cathedral of Mary Help of Christians, kaba don ha Laitumkhrah hapoh jong ka Shillong Archdiocese.
La sdang ia kane da kaba pynlong ia ka jingduwai ha ka por mynstep bad hadien kane la pynlong iaka Mass Bakhuid ha ka por 9:15 mynstep kum ka dak jong ka sdang ia ka proseshon.
Ia kane ka Mass Bakhuid la ialam da u Shillong Archbishop, u Most Rev Victor Lyngdoh ha ryngkat ka jinglong jong kiwei pat ki Bishop kiba kynthup ia u Most Rev Wilbert Marwein jong ka Nongstoiñ bad u Most Rev Ferdinand Dkhar jong ka Jowai.
Ha ka por mynsngi la sdang iaka jingiaid proseshon ha ka por 1:30 mynsngi ia kaba la sdang ia ka jingiaid na ka jaka jong ka Calvary sha ka thain Dhankheti, Shillong-Jowai Road, Laitumkhrah Main Road, Don Bosco Square bad la wanphai biang sha Calvary.
Kane ka Proseshon bah kala khring ia baroh ki riewngeit Catholic na ka nongbah Shillong bad na ki Archdiocese kum na Jowai bad Nongstoiñ, ha kaba ki surok kila shlei bad dap da ki riewngeit kiba iashimbynta ha katei ka proseshon kaba shisien shi snem. Ia kaba la tip kum ka “Corpus Christi” ne “Ka Met jong u Khrist” kadei kaba la leh naduh u snem 1247 ha Liege, Belgium bad kala kylla long kaba kongsan bha ha ki Balang Catholic kiba don ha kylleng ki ri.
