Nongstoin, Naiwieng 06 : Ka Bor District ka West Khasi Hills, kala pynbna ban mih tehlakam noh pyrshah ia ka jingrep ganja bad poppy hapoh ka District.
Ka Ophis u Superintendent of Police ka District, kala kyntu ia ki paid nongshongshnong ba lada ki don jingtip ia ka jingdon ki nong thung ganja bad poppy, ba kin sngewbha ban ai jingtip sha ki thanad ba marjan ba kin leh eiei pyrshah ia ki nongthung kat kum ki kyndon ka ain.
U SP uba dei ruh u District Level Member Secretary ka NCORD Committee, ula ong ba ia kane ka sienjam la shim kum ka lynti ban wanrah ia ka jinglong jingman kaba shngain, (kaba mut ban nym pyndonkam bakla kum ki jingdih buaid) bad ban khanglad ia ka jingthung beain ia kine ki jingthung.
Ula pynthikna ba ki Pulit kin ym iathuh iano iano ruh kiba ai jingtip shaphang ka jingdon ki briew bat hung ia kine ki jingthung.
