Shillong Risaw 31: U Lamphang ka ïing dorbar thawaiñ ka jylla u Thomas A Sangma hynne ka sngi Palei, ula leit jurip ia ka jingtei ia ka iingdorbar thawaiñ bathymmai jong ka jylla kaba don ha Mawdiangdiang bad hadien kane ula lum ruh ia ka jingialang bad ki tnad bapher bapher kiba don bynta ha katei ka kam.
Ha kane ka jingjurip la iadonlang u Commissioner & Secretary u Dr. Andrew Simons, u Secretary u Malthus Sangma bad ki ophisar jong ka Meghalaya Assembly Secretariat.
U Lamphang ula khmih bniah ia ka jinglong jingman ki kam ki jam jong ka Main Hall ha kaba ka jingpynieng ia ki tiar kiba dei da ki ‘Steel’ ka dang iaid shakhmat.
Ula pyntip ba la bud ryntih ia baroh ki kyndon katkum ka Standard Operating Procedure (SOP) ban pynthikna ia ka jingshngain jong ki nongtrei bylla bad ka jingshngain jong ka jingtei baroh kawei, hynrei la pynleit jingmut bha na ka bynta ka jingshngain jong ki nongtrei nongktah bad ia ka jinglong jingman bad jingskhem jong ka jingtei hi baroh kawei.
U Lamphang ula ong, ba ka jingiaid shakhmat jong ki kam ki jam baroh ka long kaba hun bad kane ka projek kala iaid palat ia ka por bad kala tam shi bnai na ka por kaba la buh.
Ula banjur ia ka jingkongsan ban pyndep haka por kaba la buh thymmai bad kan ym don shuh kano kano ka jingai por biang.
“Ka jingtei ia ka building kala poi sha ka bynta kaba khatduh, ha kaba la pyndep haduh 90% ia ki bynta kiba don ha ka liang kamon bad kadiang, ka ophis u Lamphang, ka kamra treikam u Myntri Rangbah, ka Secretariat office bad ka Library kidei kiba la jan dep artad.
Katba ka bynta kaba hapdeng kaban kynthup ia ka Main Hall kadei kaba dang sahteng ban pyndep” la pynpaw u Lamphang.
Ula bynrap ba u contractor bad ka PMC kila pynthikna ba ka jingtei iaka Dome yn ialeh ban pyndep hapoh kine ki 45 sngi kiban wan, kaban long syndon ka jingtei pyndep ia ka building baroh kawei.
