Shillong, Risaw 30 : Ka kynhun ki MDC ka KHADC ba ialam da u Chief Executive Member (CEM) Bah Pyniaid Sing Syiem, ha ka sngi Balang, kila iakynduh ia u Lat ka Jylla CH Vijayashankar bad pynpaw ia ka jingsngewnguh ia ka rai jong u ban mynjur pynlong ain ia ki 6 tylli ki Bill ba kongsan bala mynjur da ka Iingdorbar ka Council.
“Ngi la pynpaw ia ka jingsngewnguh ia u Lat namar ka jingai jingmynjur ia kine ki Bill ba kongsan bha kiba la mynjur da ka Iingdorbar” ong u Bah Pyniaid haba iakren bad ki nongthoh khubor hadien ka jingialang ha Raj Bhavan.
Kine ki hynriew tylli ki bill ki kynthup ia ka – the Khasi Hills Autonomous District (Administration of Elaka) (Amendment) Bill, 2023, the KHAD (Nomination and Election of the Lyngdoh, Myntri, Lyngdoh Raid and Sordar Shnong and Administration of Sohiong Lyngdohship, 2023, the KHAD (Regulation and Administration of Land) Rules, 2023, the United Khasi-Jaintia Hills District Fishery (Amendment) Bill, 2023, the KHAD (Khasi Social Custom of Lineage) (Amendment) Bill, 2023 bad ka KHAD (Trading by Non-Tribals) (Amendment) Rules, 2023.
U Bah Pyniaid ula ong b aka KHAD (Administration of Elaka) ( Amendment) Bill, 2023, kaba la long ka Act mynta, kan iarap shibun eh ha ka jingiaid beit iaid ryntih ki jingtreikam jong ki Shnong hapoh ki Hima/Elaka. Ka Act kan ai jingithuh ia ki seng longkmie bad seng samla hapoh ki Dorbar Shnong.
“Ngi don 54 tylli ki Hima bad ki don palat 3000 tylli ki shnong hapoh kine ki elaka. Ngi sngewthuh ba ka donkam ban pynkhlain ia ka jingtreikam jong ki Dorbar Shnong. Kumta, ngi sngew donkam ban ithuh ia ka bynta jong ki Seng Longkmie bad ki Seng samla . Kane kan iarap ia ki Dorbar Shnong ha ka jingtreikam ban pynthikna ia ka jingshngain bad ka suk ka sain nalor ban lah shim ia ka bynta ha kaban iakhun pyrshah ia u droks uba la ktah ia ki samla ka Jylla” ula ong.
Nalor kane, u CEM ula ong ba ka Act kan iarap ruh ban tehlakam ia ki briew, kiba wan ban shongshnong ha ki shnong ki thaw ne ki shnong kiba hap hapoh u pud u sam ka Council da kaba kin hap ban pynrung kyrteng ialade bad ki bor Shnong.
“Ki nongshongwai kin hap ban ai kyrteng bad ki Dorbar Shnong. Ka jingpynrung kyrteng kan pynthikna ba ki shnong ki don ia ki jingtip shaphang kine ki briew kiba wan ban sah ha ka shnong jong ki. Kane kan iarap bha ruh ha kaban tehlakam ia ka jingjyllei u droks” ula bynrap.
Halor ka Land Rules, u Bah Pyniaid ula ong ba kane kala aibor shisha ia ki paid riewlum da kaba pynkhlain ia ka hok jong ki halor ka khyndew ka shyiap.
“Ki briew ki lah ban register mynta ia ka jaka jong ki bad ka Council khlem da hap leit sha ki sub-registrar ha ki DC Ophis. Phi hap ban siew ia ka jngsiew kaba rit ban register jaka ha KHADC ym kum ka jingsiew ba phi hap siew sha u Sub Registrar ha ki DC Ophis kaba lah ban kot da ki lak tyngka wat ban register ia ka jaka kaba rit eh ha Shillong. Kane kan ym jia ha KHADC” ula ong.
“Nalor kane, baroh ki Bank ha Meghalaya ki hap ban ithuh ia ki kot ki sla bala ai da ka KHADC” ula bynrap.
 Bah Pyniaid Sing Syiem, ha ka sngi Balang, kila iakynduh ia u Lat ka Jylla CH Vijayashankar bad pynpaw ia ka jingsngewnguh ia ka rai jong u ban mynjur pynlong ain ia ki 6 tylli ki Bill ba kongsan bala mynjur da ka Iingdorbar ka Council.){kind=link}