Pynbna u Myntri ia ka rai ban pyntreikam ia ka “Tourism buddy scheme”
Shillong, Risaw 29 : U Myntri kam jngohkai Bah Paul Lyngdoh ha ka sngi Ba-ar, ula shong bishar kam halor ka jingpyntrei kam ia ki project bapher bapher kiba kot palat T.400 klur na ka bynta ka jingroi bad jingkyntew ia ki kam jngohkai hapoh ka Jylla.
Ula pynbna ruh ia ka rai ban pyntreikam ia ka “Tourism buddy scheme”, ka ban pynsuk ia ki nongwan shangkai haba ki leit kai sha kylleng ki jaka jong ka Jylla.
Haba kren sha ki lad pathai khubor hadien ka jingialang, u Bah Paul ula ong “Ka jingialang bishar kam ba kham bun mynta ka sngi ka dei halor ki kam jngohkai, ia kaba phi iatip ba mynta ngi la poi ha kawei pat ka kyrdan da ka jingioh jingithuh jong ka Shillong kum ka jaka ba iajied bha da ki nongwan shangkai ha u snem 2025”.
U iathuh ba u Commissioner & Secretary bad u Director kila batai bniah ia u halor ki project bapher bapher (kiba kot palat T.400 klur) kiba la pyntrei mynta.
“(Na kine), ngi don katto katne ki project kiba la bei tyngka da ka Asian Development Bank (ADB) ba kot haduh T.191 klur bad kumjuh ruh na ka State Plan, ngi la mang ia ka song pisa ba T.227 klur na ka bynta ki jingtei bapher bapher ha kylleng ki jaka jong ka Jylla Meghalaya” ula bynrap.
U Myntri ula pyntip ruh ba ka Tnad kan sa wanrah noh shen ia ka skhim kaba khot ka “Tourism buddy scheme” ban thung ia ki samla, ki ban sa ioh ia ki jinghikai ba katto katne bnai ba kin peit ia ka kam pahara, ialam lynti ia ki nongwan shangkai bad ruh ban pynlong ia ki nongwan shangkai ba kin sngew aram ba kin sah ha Shillong bad ha kiwei ki jaka jong ka Jylla.
“Ngin sdang da ka kynhun ba kumba 70 ngut ki samla. Kane kan sa wan ha ka dur jong ka NIT (notice inviting tender), ka ban sa pynmih shen da ka Directorate of Tourism. Ngin sa pynmih ia NIT ha kine ki ar-lai sngi ban wan naba ngi kwah ban iohi noh ia ki ha ki pdeng taiew jong u Naiwieng, namar kane ka dei ka por jong ka samoi shangkai” ula ong.
“Ngin pynthikna ba ngin iatreilang bad ki Dorbar bad ki Society bapher bapher, ha ki jaka ba khlain ka jingwan ki nongshangkai. Ki (tourism buddy) kin kum ki nonglam lynti, ki nongiarap, ki nongpynkylla ktien bad kin iarap ia ki briew, kiba lah ban jah lynti shane shatai” ong u Bah Paul haba bynrap ba kine ki tourism buddy kin don eh ha ki jaka ba bun ki nongwan shangkai kum ha Laitlum, Ward’s Lake, Krem Mawsmai, krem Arwah, Nohkalikai, Dainthlen, Mawlynnong, Mawkdok, Golflink, Shnongpdeng, Krangsuri bad kiwei kiwei.
U Myntri ula shong bishar kam ruh halor ka Shillong Ropeway Project bad pyntip “Ki kam kila iaid ha ka lynti kaba dei bad ha ki pdeng taiew u Naiwieng, ka jingpyntrei kan sa sdang noh”.
Nalor kane, u Bah Paul ula pyntip ba ia ka Tamasa Cherry Blossom ba arsngi, kaba dei ka tamasa ba paw bha, yn sa wan ban plie pyrda da u Myntri ka DoNER ha ka jingiadonlang u Myntri Rangbah ka Jylla bad u Myntri kam jngohkai, ha ka 15 tarik u Naiwieng.
“Ngi dang ia ap ia ka jingpynthikna na ka Sorkar ka ri Japan ka ban sap hah ia ki heh ki hain ban iadonlang ha kane ka tamasa namar kane kan dei ka sien ba nyngkong ba ngi la iatreilang bad ka Ri ba nabar” ula ong.
Ula bynrap ba ka LIT festival ruh kan sa long ha ka 17-18 tarik Naiwieng bad kin sa don shibun ki nongthoh kot ba pawnam ki ban wan iashimbynta.
