Gangtok, Risaw 19: Hadien ka jingshah puid kaba la 12 snem tam, la klet ia kawei ka khanshi ha ka kpoh jong kawei ka longkmie kaba na Sikkim bad ia katei la lap bad la sei noh dang shen.
Ia katei ka jingjia la lap hadien ba katei ka nongpang kala shah puid biang ha STNM hospital ha Sikkim ha ka 8 tarik u Risaw. Ia katei ka khanshi puid la kum ieh hapoh ka kpoh jong katei ka nongpang ha ka por ba ka dang shah puid na ka jingweng ia u Appendix ha u snem 2012.
Katkum ka jingiathuh jong u kurim jong katei ka longkmie, ula ong ba ka kurim ka jongu kala shah puid naka bynta ban weng ia Appendix ha ka STNM hospital kaba rim ha u snem 2012. Hadien kane, kala sdang ban sngewwit bad kumjuh ban pang ha ki bynta jong ka kpoh.
Kane ka nongpang kala hap ban iaid lyngba ka jingshah khmih bniah mynta la bun snem, hynrei ym shim la lap ba katei ka khanshi kan sahkut hapoh ka kpoh ka jongka. Dei ha ka 8 tarik u risaw ki doctor kila lap ia ka khanshi puid ha ka kpoh ka jongka hadien ba kila pynlong ia ka jingtohkit kaba bniah.
Hadien ba kila lap ia katei ka khanshi hapoh jong ka kpoh, ka kynhun jong ki stad ki jhad ha ka lain sumar kila puid ia katei ka longkmie bad kila ioh ban sei noh ia katei ka khanshi. Katkum ka khubor ba la iohlum, la iathuh ba ka koit ka khiah jong katei ka long ka long kaba biang bad kaba shngain bad kala sdang ban iohbor bha.
Katei ka jingjia kala pynlong ia kiba bun ban bitar bad ban kynthoh jur ha kylleng jong ka jylla bad ki paidbah kila dawa ba dei ban leh da kaba tyngeh pyrshah ia kito kiba donkti ban leh khlem akor ha ka rukom treikam.
Ka jingtohit na ki bor hospital halor katei ka jingjia ka dang iaid shakhmat.
