Dibrugarh, Risaw 18: Ka kynhun ba 5 ngut jongka CBI hynne ka sngi Thohdieng, kila wan poi ha Dibrugarh, ban pynlong ia ka jingtohkit halor ka jyrsieh khaii Online kaba la kot da ki hajar klur pyrshah ia u Bishal Phukan, ka nongak phlim ka Sumi Borah, Tarkik Borah bad u Amlan Borah.
U Superintendent of Police ka Dibrugarh u Rakesh Reddy ula pynthikna ia ka jingwanpoi jong katei ka kynhun ki 5 ngut ki Ophisar CBI bad ula ong, “Ia ki kot ki sla kiba donkam kiba iadei bad katei ka jingjia, la dep ban aiti ha ka kynhun jongka CBI hapoh ka Dibrugarh Police Station. Ngi ai ka jingiatreilang kaba pura bad ki”.
Haduh mynta ka jingtohkit la pyniaid shakhmat da ki pulit jongka Dibrugarh hapoh ka jingialam u Additional SP (Crime) Sizal Agarwal.
Ki tyllong khubor kila iathuh ba ka jingtohkit ia kiba donkti ha katei ka kam kiba don hapoh jongka Dibrugarh Central Jail yn sa sdang noh da ka kynhun jong ka CBI naduh ka sngi saitjain.
Ha ka 3 tarik u Nailur, u nongshna bad nongpynwandur iaka jyrsieh khaii Online kaba da ki hajar klur tyngka u Bishal Phukan 22 snem ka rta ula shah kem ga ki pulit ka Dibrugarh Police hadien ba katei ka jyrsieh kaba la antad ba kala kot ia ka T.2,200 Klur kala paw pyrthei. Ki pulit ka Dibtrugarh kila shim suo-motu case halor katei bad hadien la ujor 4 tylli ki ejahar da ki katto katne ki nongbei tyngka pyrshah ia u Bishal Phukan.
Arngut na ki nongiarap jongu Phukan kiba kynthup ia ka Sumi Borah bad u nongshondur u jongka uba dei ruh u kurim jongka u Tarkik Borah kila shah kem ha ka Special Task Force (STF) jong ki pulit Assam ha ka 12 tarik u Nailur. Shi sngi shwa katei, u para kynsi jong ka Sumi u Amlan Borah ula shah kem na Muzzaffarpur District na Bihar ha ka jingkhynra kaba la pynlong da ki pulit ka Assam bad pulit ka Bihar. La pynngat ia une uba la shah kem ha ki kyndon 316(2)/318(4) jongka BNS 2023, ryngkat bad ka kyndon 21/23 jongka Banning of Unregulated Deposit Scheme Act, 2019.
Katkum ka jingiathuh ki pulit, katei ka jingkhaii online kala treikam mynta la jan 3 snem, ha kaba la pynbiej ia ki paidbah da kaba kular ban siew arshah ia ka pisa kaba kila bei hapoh jongka 60 sngi. Ki bor kiba dei khmih kila kynnoh ba ia ka pisa kaba la lum la thep sha ka karkhana shimet kaba lam sha ka jingle thok ia palat 1500 ngit ki nongbei tyngka.
