Ka Shillong Airport ka nongpynkylla kaba khraw ia ki kam jngohkai ha Jylla

Shillong, Risaw 17 : U Myntri tnad jngohkai bah Paul Lyngdoh ha ka sngi Thohdieng u la ong ba ka jingpynheh ia ka kad liengsuin jong ka Shillong (Shillong Airport) kan long ka jingkylla kaba khraw ia ka jylla bad ka kam jngohkai pyrthei.

Katkum ka jingong jong u, palat 3000 ngut ki samla kin ioh kam na ka kam kamai kali.

Haba kren sha ki lad pathai khubor ha ka sngi Palei, u bah Paul u la iathuh ba ka Committee ba la thaw da ka sorkar kaba la khlieh da u Director ka tnad jngohkai, ka la ju pynlong ia ka jingiasyllok man ka por bad baroh kiba kynhun kiba don bynta ha ki kam jngohkai.

“Nga la iashimbynta hi dalade ha ki ar tylli ki conclave bad nga la ïakynduh ïa ki kynhun bapher bapher ha ka liang ka kam jngohkai pyrthei. Ka jingpynheh ia ka kad liengsuin kan long ka jingkylla kaba khraw. Hadien ba dep pynheh, ka jingshaniah jong ngi ha ka jingpyniasoh na ki surok bad ka leit ka wan na ki surok kan duna bha bad kumjuh ruh ryngkat ki jingtreikam jong ka tnad, ngin sa don ha ka kyrdan ban ai kam ai jam ia ki samla ym duna ia ka 3000 ngut ha ka kam niah kali,” u la ong.

U Bah Paul u la pynbna ruh ba shen ka tnad kan sa khot iakren ia ki kynhun bapher bapher ba khmih ia ki nongshang kai pyrthei.

“Ngin sdang da ki 50 ngut ki samla, ki ban long shi bynta ban ialam lynti, ai jingtip bad kyllum lang ban mihkhmat ïa ka dur khmat jong ka Meghalaya haba phai sha ka jingpynbeit ia ki kam ki jam bad ki nongwan jngohkai ha ka jylla. Ha kaba sdang, ngin sa don ïa kine ki kynhun ha Sohra, Umiam bad ha Shillong,” u la ong.

Haba kylli halor ki mat ba la pynpaw da kawei ka seng tourist taxi, u bah Paul u la ong ba ka committee kan sa iakynduh ia ki lashai ka sngi.

“Kaba ar, phi la ïohi ïa ka jingkynthoh jong ki kynhun bapher bapher. Ki la pynksan ha kaba ong ba phim lah ban khanglad ïa ki kali tourist na kawei pat ka jylla ba kin wan sha Meghalaya. Ki la kren shai bha. Kam dei ka sorkar kaba ong hynrei dei ki kynhun bapher bapher, kiba la kren. Haba ong kumta, ngi hap ruh ban peit ia lade, ia ka rukom ai jingshakri kaba ngi donkam ban pynjanai, ka jinglong ki briew, ka riam ka beit, ka jingbud pur bad kiwei kiwei. Ha ka pyrthei kaba iabeh, ki briew ki don ki lad ban jied. Nalor kata, ngi don ka jingduna haduh 3500 tylli ki kali kiba kit ïa ki briew sha Meghalaya,” u la bynrap.

Nalor kane, u Bah Paul u la pyntip ba ka Umiam kan sa kylla long shen ka jaka jngohkai kaba heh bha.